سىرتقى ىستەر مينيسترلىگى پاريجدەگى وتانداستارىمىزدى اباي بولۋعا شاقىردى

استانا. قازاقپارات - پاريجدەگى نارازىلىق اكسياسىنا وراي قازاقستان سىرتقى ىستەر مينيسترلىگى اتالمىش قالاداعى قازاقستاندىقتارعا ۇندەۋ جولدادى. بۇل تۋرالى ۆەدومستۆونىڭ تەلەگرام- پاراقشاسىندا جازىلدى.

«پاريجدەگى نارازىلىق تولقۋىنان تۋىنداعان تارتىپسىزدىكتەرگە بايلانىستى قازاقستان ەلشىلىگى فرانسياداعى وتانداستارىمىزعا ۇندەۋ جولدادى. وندا ەلشىلىك حالىقتى بارىنشا اباي بولىپ، جاۋاپكەرشىلىكتى ۇمىتپاۋعا شاقىرادى. سونداي- اق، ادام كوپ جينالعان جەرلەردەن اۋلاق ءجۇرىپ، اسا قاتتى مۇقتاجدىق بولماسا، مۇمكىندىگىنشە قاۋىپسىز جەردەن شىقپاي، قۇقىق قورعاۋ ورگاندارىنىڭ تالاپتارىن ساقتاۋ جونىندە كەڭەس بەرەدى.» دەلىنگەن حابارلامادا.

ەلشىلىكتىڭ مالىمەتىنشە، قازىرگى تاڭدا زارداپ شەككەندەر اراسىندا قازاقستاندىق ازاماتتار جوق.

 ايتا كەتۋ كەرەك، پاريجدە 5,5 مىڭنان استام ادام اۆتوكولىك وتىنى باعاسىنىڭ كوتەرىلۋىنە بايلانىستى نارازىلىق اكسياسىنا شىعىپ، ونىڭ سوڭى بەيبەرەكەت تارتىپسىزدىكتەرگە ۇلاسقان- دى. بۇگىنگى تاڭدا 107 ادام قاماۋعا الىندى.

اۆتور: جانات قاپالبايەۆا