ەلباسى: جاس ۇرپاقتىڭ زامان تالابىنا ساي بولۋى بازالىق بىلىمگە بايلانىستى

استانا. قازاقپارات - ءار ايماقتاعى كەز كەلگەن دارىندى پەرزەنت نازاربايەۆ زياتكەرلىك مەكتەپتەرىندە قابىلەتىن شىڭداي الادى.

بۇل تۋرالى «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ 10 جىلدىعىنا ارنالعان «ۇلى دالا مۇراگەرلەرى» اتتى فورۋمدا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«بۇگىن بارشاڭىزدى زياتكەرلىك مەكتەپتىڭ 10 جىلدىق مەرەيتويىمەن شىن جۇرەگىمنەن قۇتتىقتاۋعا كەلدىم. بۇل الەمدەگى وركەنيەتتىڭ ونەگەسىن ۇستانعان ءبىلىم وشاقتارىنىڭ بەرەكەلى بەلەسى. نازاربايەۆ ۋنيۆەرسيتەتى قۇرىلعاننان كەيىن، وسى وقۋ ورنىنا تۇسەتىن وقۋشىلار، ستۋدەنتتەر كەرەك. سۇرانىس كوپ، ءبىراق ەمتيحاننان ءوتۋ وڭاي ەمەس، مەكتەپتەردە وقۋشىلاردى جاقسىلاپ دايارلاۋ قاجەت بولدى. سوندىقتان وسىنداي زياتكەرلىك مەكتەپتەر قازاقستاننىڭ ءار تۇپكىرىندە بولسىن دەگەن يدەيانى ىسكە اسىردىق. ەندى، مىنە، نازاربايەۆ زياتكەرلىك مەكتەپتەرىنىڭ 10 -جىلدىعىن اتاپ وتۋدەمىز»، - دەپ توقتالدى مەملەكەت باسشىسى.

وسى ورايدا پرەزيدەنت بۇل وقۋ ورىندارى ەلىمىزدەگى ورتا ءبىلىم بەرۋدىڭ ەڭ جوعارى ەتالونىنا اينالعانىن اتاپ ءوتتى.

«قازىر قازاقستانداعى بارلىق مەكتەپتەر سىزدەرگە قاراپ بوي تۇزەيدى، ادىستەمەلەرىن الىپ وتىر. جاس ۇرپاقتىڭ زامان تالابىنا ساي بىلىكتى بولۋى بازالىق بىلىمگە تىكەلەي بايلانىستى، ياعني مەكتەپتەگى بىلىمگە. قازاقستان وڭىرلەرىندە اشىلعان 20 زياتكەرلىك مەكتەپتى بۇگىنگە دەيىن 8 مىڭ تۇلەك ءتامامدادى. اتالعان ءبىلىم ورداسىنىڭ وقۋشىلارىنا قويىلاتىن تالاپ وتە جوعارى ەكەنىن بىلەسىزدەر. سوندىقتان مىندا «جۇزدەن جۇيرىك، مىڭنان تۇلپار» شىققان بالالار عانا تۇسە الادى. ءار ايماقتاعى كەز كەلگەن دارىندى پەرزەنت قابىلەتىن وسى مەكتەپتەردە شىڭداۋى ءۇشىن وقۋ ورىندارىن اشتىق. ەلىمىزدىڭ تۇپكىر- تۇپكىرىندە تۇراتىن تالانتتى ۇلانداردىڭ بولاشاعى جارقىن بولۋىنا سەپتىگىن تيگىزەدى. زياتكەرلىك مەكتەپتەردە ءبىلىمنىڭ ساپاسى مەن تيىمدىلىگى الەمدىك دەڭگەيدە مويىندالدى. بۇگىنگى كەزدەسۋ بارىسىندا شەتەلدىك مۇعالىمدەر، پروفەسسورلار، سونداي-اق باسقا دا ۋنيۆەرسيتەتتەردىڭ وكىلدەرى اتالعان مەكتەپتىڭ جوعارى دەڭگەيىن راستاپ وتىر»، - دەدى نۇرسۇلتان نازاربايەۆ.