تۇركىستاندىق پوليتسەيلەر وزبەكستاندىق ارىپتەستەرىمەن بىرلەسىپ ارەكەت ەتەتىن بولدى

تۇركىستان. قازاقپارات - شىمكەنتتە وزبەكستان رەسپۋبليكاسىنىڭ ءى ءى م  وكىلدەرى مەن تۇركىستان وبلىسى جانە شىمكەنت قالالىق پوليتسيا دەپارتامەنتى باسشىلارىنىڭ ەكىجاقتى كەزدەسۋى ءوتتى.

باس قوسۋدا تاراپتار ەكسترەميزمگە قارسى كۇرەس جانە زاڭسىز كوشى-قون سالاسىنداعى شەكارالىق ىنتىماقتاستىق ماسەلەلەرىن تالقىلادى، دەپ حابارلايدى قازاقپارات ءتىلشىسى.

كەزدەسۋگە ق ر ءى ءى م شتاب باستىعى، پوليتسيا پولكوۆنيگى قايرات سۇيىنبايەۆ پەن تۇركىستان وبلىستىق پ د باستىعى، پوليتسيا پولكوۆنيگى قايرات دالبەكوۆ باستاعان دەپارتامەنت باسشىلىعى جانە سارىاعاش، كەلەس، ماقتارال، شاردارا جانە جەتىساي اۋداندىق پوليتسيا بولىمدەرىنىڭ باستىقتارى قاتىستى. وزبەكستاندىق دەلەگاتسيا تاراپىنان ءى ءى م ۇيىمداستىرۋ دەپارتامەنتىنىڭ باستىعى شۋحرات نورگيتوۆ جانە شەكارالىق جيزاق، تاشكەنت جانە سىرداريا وبلىستارىنىڭ باستىقتارى گەنەرال-مايور گايرات كاديروۆ، پولكوۆنيك توحتار اريپوۆ، پولكوۆنيك مۋحيتدين جۋرايەۆ باستاپ كەلدى.

كەزدەسۋ بارىسىندا ءتارتىپ ساقشىلارى ەكى ەلدىڭ ىشكى ىستەر ورگاندارىنىڭ قىلمىسقا قارسى كۇرەس سالاسىنداعى ءوزارا بايلانىستى الداعى ۋاقىتتا جانداندىرۋ ماسەلەلەرىن ءسوز ەتتى. ويتكەنى بۇگىنگى تاڭدا ترانسۇلتتىق ەسىرتكى تاسىمالىنىڭ ءوسۋ قاۋپى تۋىنداپ وتىر. كوشى-قون پروتسەستەرى قيىنداپ، كريمينوگەندىك احۋال بىرلەسە وتىرىپ جۇمىس ىستەۋدى تالاپ ەتىپ وتىر.

ەكىجاقتى كەزدەسۋدىڭ ناتيجەسىندە قاتىسۋشىلار ەكسترەميزمگە قارسى ءىس-قيمىل مەن جەدەل-پروفيلاكتيكالىق ءىس-شارالاردى ۇيىمداستىرۋ، كوشى-قون ماسەلەسى بويىنشا اقپاراتتار الماسۋعا ۋاعدالاستى. بۇدان بولەك، ەسىرتكى تاسىمالداۋ مەن بوتەننىڭ مۇلكىن ۇرلاۋ، اۆتوكولىكتى زاڭسىز يەلەنۋ سياقتى ءبىرقاتار ماسەلەلەر بويىنشا ۇسىنىستار ايتىپ، پىكىر الماستى.

كەزدەسۋ سوڭىندا قازاقستان مەن وزبەكستان ءى ءى م وكىلدەرى قىلمىسپەن كۇرەس جانە شەكارالىق ىنتىماقتاستىق سالاسى بويىنشا بىرلەسىپ ۇيىمداستىرىلاتىن جانە ءىس جۇزىندە جۇزەگە اسىرىلاتىن ماسەلەلەر بويىنشا ءبىرقاتار قۇجاتتارعا قول قويدى.