بەس مىسىعى اياق استى جوعالىپ كەتكەن قاريا ۇيىندە بولىپ جاتقان سۇمدىق جايتتى ءبىلدى

  استانا. قازاقپارات - تايلاندتىڭ چاچەنگساۋ پروۆينتسياسىندا زەينەتكەردىڭ ۇيىندە ۇزاق ۋاقىت بويى جاسىرىنىپ كەلگەن پيتون ۇستالدى.

بۇل تۋرالى Newsflare باسىلىمى حابارلايدى.

65 جاستاعى رۋانگ پەۋنگ ءۇيىنىڭ كىرەبەرىس ەسىگى ارقىلى سىرتقا شىعىپ بارا جاتقان الىپ جىلاندى كورىپ، شوشىپ كەتكەن. ول بىردەن شۇعىل قىزمەتكە قوڭىراۋ شالىپ، بولعان وقيعا تۋرالى حابارلايدى. ارتىنشا ۇيگە جانۋارلاردى اۋلايتىن مامان كەلىپتى.

ۇيدە تەكسەرىپ شىققان مامان جىلاندى ءۇيدىڭ استىنان تاۋىپ الدى. جىلان اۋلاۋشىلار پيتوندى ءبىر ساعات بويى شىعارۋعا تىرىسادى. الايدا بورەنەگە ورالىپ العان جىلان بەرىلە قويمايدى. ناتيجەسىندە ەكى ەر ادام جىلاندى قۇيرىعىنان تارتىپ، ءۇشىنشىسى جىلاندى دەنەسىنىڭ جوعارى بولىگىنەن تەبەدى.

وسىلايشا، جىلاندى ءۇيدىڭ استىنان الىپ شىققان ماماندار ونى قاپقا سالىپ، ادام كوپ جۇرمەيتىن الىس جەرگە اپارىپ تاستادى.

زەينەتكەردىڭ ويىنشا، ءدال وسى جىلان ونىڭ مىسىقتارىن جۇتىپ قويعان. ونىڭ ۇيىندەگى سوڭعى مىسىق جىلان ۇستالاردان بىرنەشە ساعات بۇرىن عانا جوعالىپ كەتىپتى.

«بىلتىر ۇيىمدەگى 5-6 مىسىق جوعالىپ كەتتى. بۇل جىلاننىڭ ۇيىمدە جاسىرىنىپ جۇرگەنىنە كوپ بولعانىنا سەنىمدىمىن. مەن ءوز توسەگىمدە ۇيىقتاپ جاتتىم، ال استىندا جىلان جۇرگەن» ، - دەيدى قاريا.