ولگا رىپاكوۆا: بەيجىڭ وليمپياداسىنىڭ كۇمىس جۇلدەسى ەكىۇداي سەزىم سىيلادى
Olympic.kz سايتىنا سۇحبات بەرگەن سپورتشى اتالعان مەدالدىڭ قۇنى قانداي ەكەنىن ايتىپ، الداعى ليتسەنزيالىق تۋرنيرلەرگە دايىندىقتىڭ قالاي ءوتىپ جاتقانىن مالىمدەدى.
- ولگا حانىم، بيىلعى ماۋسىم دا ءوز مارەسىنە جەتتى. سپورتتىق مانسابىڭىزداعى كەزەكتى كۇنتىزبە جابىلدى. جىلدىڭ قورىتىندىسىن جاساپ ۇلگەرگەن شىعارسىز؟
- بيىلعى جارىس ماۋسىمىنا قاناعاتتانارلىق دەگەن باعا بەرەر ەدىم. باستى ماقساتى - ازيا ويىندارىندا ءساتتى ونەر كورسەتۋ بولدى. سول سەبەپتى، بار كۇشىمدى ازياداعا ساقتادىم. ارينە، دەنساۋلىعىم دا سىر بەردى. شامادان تىس قينالماۋ ءۇشىن جاتتىعۋدى دا ازداپ تەجەي تۇرۋعا، ءبارىن رەتىمەن ورىنداۋعا تۋرا كەلدى. جاكارتادا ەل قورجىنىنا التىن سالسام دەگەن ماقساتىم ورىندالدى. ەڭ باستىسى وسى.
- جالپى، وسى ماۋسىمداعى كورسەتكىشتەرىڭىز كوڭىلدەن شىعا ما؟
- شىنىمدى ايتسام، ماۋسىمداعى ناتيجەلەر مەن كۇتكەندەي بولمادى. كوپتەگەن جارىستا ءوز مەجەمە جەتە المادىم. مۇنىڭ سەبەپتەرى دە جوق ەمەس، ارينە. دەگەنمەن، جىلدىڭ ەڭ باستى باسەكەسى - ازيا ويىندارىندا التىن العان سوڭ، جوسپارلارىم از دا بولسا ورىندالدى دەۋگە نەگىز بار. ەندى ءبىزدى كەلەسى ماۋسىم كۇتىپ تۇر. وزدەرىڭىز بىلەسىزدەر، الداعى جارىس ماۋسىمى تارتىسقا تولى بولماق. الدا وليمپيادا ويىندارى كەلە جاتىر.
- وليمپيادا ويىندارىنا جولداما الۋعا مۇمكىندىك بار ما؟
- مۇمكىندىك قاشان دا بار! كەلەسى جىلى ليتسەنزيالىق تۋرنيرلەر مەن دوحادا الەم چەمپيوناتى وتەدى. بۇيىرسا، مەن جولداما العاندار تىزىمىنە ىلىگەمىن دەپ ويلايمىن. تەك جاراقات الىپ قالماسام بولعانى... ەگەر ءبارى ءوز رەتىمەن، قانداي دا ءبىر وقىس جاعدايلارسىز وتسە، دوحادا بابىمدا بولاتىنىم ءسوزسىز.
- بيىل ءسىزدىڭ مەدال قورجىنىڭىز بەيجىڭ وليمپياداسىنىڭ كۇمىس جۇلدەسىمەن تولىقتى. ون جىلدان سوڭ بۇيىرعان مەدال قانداي سەزىم سىيلادى؟
- بەيجىڭ وليمپياداسىنىڭ كۇمىس جۇلدەسى ەكىۇداي سەزىم قالدىردى. بىرىنشىدەن، مەندەگى جۇلدەلەر سانى تاعى بىرگە ارتتى. بۇل قۋانتادى. ال ەكىنشى جاعىنان، ەشقانداي ەموتسيا بولعان جوق. مەندە مۇنىمەن سالىستىراتىن مەدالدار جەتەرلىك. سالىستىرمالى تۇردە قاراساق، جارىس جولاعىندا، قالىڭ كورەرمەننىڭ الدىندا موينىڭا تاققان مەدال قاشان دا ىستىق. ون جىل وتسە دە، بۇل كۇمىس مەنىڭ قولىما جەتكەن جوق. تەك حاتتاما بويىنشا عانا مەنىڭ ەسىمىم تۇر. ءيا، مەنىڭ ءومىربايانىما بەيجىڭ وليمپياداسىنىڭ كۇمىس جۇلدەگەرى دەگەن تاعى ءبىر جول قوسىلاتىن شىعار. ءبىراق مەن ءبارى جارىس كەزىندە ادىلەتتى تۇردە انىقتالعانىن قالايمىن. سول كەزدە عانا مەدالدىڭ باعاسى ىستىق بولادى.
- ءسوز سوڭىندا جىلدىڭ قورىتىندى وقۋ-جاتتىعۋ جيىندارىنا توقتالىپ وتسەڭىز...
- كۇز ايلارىندا ءبىز تۇركيانىڭ بەلەك قالاسىندا ەكى جاتتىعۋ جيىنىن وتكىزدىك. ءبىرىنشىسى قالىپقا كەلتىرۋ جاتتىعۋى بولسا، ەكىنشىسىندە كادىمگى دايىندىق باستالدى. كوپشىلىك بۇل قالانى نەگە تاڭدادىڭدار دەپ جاتادى. بۇعان سەبەپ - اتالعان قالادا اۋا رايى قولايلى ءارى جاتتىعۋعا ارنالعان الاڭقايلار كوپ. ەندى ازداعان ءۇزىلىس الىپ، ليتسەنزيالىق تۋرنيرلەرگە دايىندىقتى باستايمىز.