تۇركىستاندا قوجا احمەت ياساۋي تۋرالى كوركەم فيلم تۇسىرىلەدى
بۇل تۋرالى كەشە پرەزيدەنت اكىمشىلىگىنىڭ جەتەكشىسى اسەت يسەكەشيەۆتىڭ توراعالىعىمەن وتكەن قوعامدىق سانانى جاڭعىرتۋ جونىندەگى ۇلتتىق كوميسسيانىڭ وتىرىسىندا ءمالىم بولدى. جيىندا جاڭا ماقالادا جاريالانعان جوبالار جايى تالقىلاندى.
«بۇل باستامالار - «رۋحاني جاڭعىرۋ» باعدارلاماسىنىڭ زاڭدى جالعاسى. سوندىقتان ولاردى جۇزەگە اسىرۋ ۇلتتىق كوميسسياعا جۇكتەلگەن ماڭىزدى مىندەت»، - دەدى اسەت يسەكەشيەۆ.
باسقوسۋدا جاۋاپتى تۇلعالار بايانداما جاساپ، ماقالا اياسىندا قولعا الىناتىن ىستەرگە توقتالدى.
ماسەلەن، تۇركىستاندا قوجا احمەت ياساۋي مۋزەيى بوي كوتەرىپ، تاريحي تۇلعا جايلى كوركەم فيلم تۇسىرىلەدى. سوسىن ءال- فارابي تۋرالى انيماتسيالىق تۋىندى جارىق كورەدى. بۇدان بولەك، ۇلى دالاداعى ۇلى تۇلعالاردىڭ ءتىزىمى جاساقتالىپ، مۇراعات مالىمەتتەرى تۇگەندەلۋى ءتيىس.
دارحان قىدىرالى، حالىقارالىق تۇركى اكادەمياسىنىڭ پرەزيدەنتى:
- ەلباسىنىڭ «ۇلى دالانىڭ جەتى قىرى ماقالاسى - حالىقارالىق جوبا. سەبەبى ۇلى دالادان، التايدان تاراعان جالپى تۇركى الەمى گەنەزيسياسىنا قىزىعۋشىلىق تانىتقان عالىمداردى تارتۋ، سولاردىڭ دا ارالاسۋىمەن انىق دالەلدەنگەن ەڭبەكتەر جازۋ ايتىلعان بولاتىن.
بۇركىتباي اياعان، تاريح عىلىمدارىنىڭ دوكتورى، پروفەسسور:
- كەلەسى ماڭىزدى ماسەلە - قازىرگى مادەنيەت سالاسىنداعى جۇمىستاردى جاڭا دەڭگەيگە كوتەرۋ. ماعان ۇناعانى، جاڭا تەحنولوگيالاردى پايدالانۋ ارقىلى قازاقستان مادەنيەتىن الەمگە شىعارۋ.
ەرلان سىدىقوۆ، گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى:
- كەلەر جىلى الەمدىك تۇركولوگتار كونگرەسىن وتكىزۋ - بۇل وسى ۇلكەن رۋحاني جاڭعىرۋ باعىتىنداعى ءىس- شارالاردىڭ ەڭ شوقتىعى دەپ ءتۇسىنۋ كەرەك.
www.24.kz