پۋتين: كەرچ بۇعازىنداعى جانجال - ارانداتۋ

استانا. قازاقپارات - رەسەي پرەزيدەنتى ۆلاديمير پۋتين قارا تەڭىزدە ۋكراينا تەڭىزشىلەرىن كۇش قولدانىپ تۇتقىنداۋدى «ۋكراينادا وتەتىن پرەزيدەنت سايلاۋى الدىندا كيەۆتىڭ ۇيىمداستىرىپ وتىرعان ارانداتۋى» دەپ مالىمدەدى.

پۋتين بۇل جونىندە 28 - قاراشا كۇنى ماسكەۋدە وتكەن «رەسەي شاقىرادى» فورۋمىندا ايتتى. وسىعان دەيىن ۋكراينا پرەزيدەنتى پەتر پوروشەنكو كەرچ بۇعازىنداعى وقيعانى «رەسەي باسقىنشىلىعى» دەپ اتاعان.

پۋتين سونىمەن بىرگە ۋكراينانىڭ شىعىسىندا قاقتىعىس بولعان كەزدە جاريالانباعان اسكەري جاعدايدى ەندى «بولماشى وقيعاعا» بولا جاريالاپ وتىرعانىن ايتتى. رەسەي پرەزيدەنتى سونىمەن قاتار پەتر پوروشەنكونىڭ «رەيتينگى تومەن بولعاندىقتان، الداعى پرەزيدەنت سايلاۋىندا باسەكەلەستەرىنە كەدەرگى كەلتىرۋگە تىرىسىپ جاتىر» دەپ سانايدى.

25 - قاراشا كۇنى تاڭەرتەڭ كەرچ بۇعازىندا رەسەي اسكەريلەرى ۋكراين كەمەلەرىن اتقىلاپ، ۇستاپ اكەتكەن. بىرنەشە اسكەري جارالانعان. رەسەي ۋكراين كەمەلەرىن تەرريتورياسىنا «زاڭسىز كىردى» دەپ ايىپتاسا، ۋكراينا كەمەلەردىڭ بۇل اۋماقتان وتەتىنى «الدىن- الا ەسكەرتىلگەنىن» ايتىپ، رەسەي ارەكەتىن «باسسىزدىق» دەپ اتاعان.

ۋكراينا قارۋلى كۇشتەرىنىڭ مالىمەتىنشە، اتىستان كەيىن 23 ادام بولعان كەمەلەرمەن بايلانىس ۇزىلگەن. التى ۋكراين ساربازى جارالانعان. ونىڭ ەكەۋىنىڭ ءحالى اۋىر، ۇشەۋى كەرچ اۋرۋحاناسىندا جاتىر. جاعدايلارى ءبىر قالىپتى.

28 - قاراشادا ۋكراينانىڭ رەسەيمەن شەكتەسەتىن ون وبلىسىندا ءبىر ايعا اسكەري جاعداي جاريالاندى.

www.azattyq.org