داۋرەن ابايەۆ: سيفرلى راديوحابار تاراتۋ ماسەلەسىن قاراستىرۋعا دايىنبىز
«ءبىز راديونى دامىتۋ كەرەك ەكەندىگىن بىلەمىز. قازىر ءبارىن نە مازالايدى؟ بۇگىنگى تاڭدا سيفرلىق راديو پايدا بولدى. ءبىز الداعى ۋاقىتتا سيفرلىق راديوحابار تاراتۋ ماسەلەسىن قاراستىرۋعا دايىنبىز. دەمەك، ول ەنگىزىلسە، اۆتوكولىكتەردە راديوحابار قىزمەتى بولمايدى. بارلىعىن دا وزگەرتۋگە تۋرا كەلەدى. ماسەلەن، ءۇندىستاندا بۇل پروتسەس باستالىپ كەتتى. رەسەي ەندى عانا قاراستىرىپ جاتىر. البەتتە، بۇل قادام راديونىڭ ساپاسىن ارتتىرۋعا سەرپىن بەرەدى. راديوستانسيالاردىڭ دا ساپاسىن ارتتىرۋعا جول اشىلادى. بۇل ءبىزدى مازالاپ وتىرعان ۇزاق مەرزىمدى ماسەلە»، - دەدى داۋرەن ابايەۆ استانادا ءوتىپ جاتقان VIII ازاماتتىق فورۋم سەسسياسىندا.
ءمينيستردىڭ ايتۋىنشا، وسى جىلدىڭ اياعىنا دەيىن قازاق جانە شالقار راديولارى ەلىمىزدىڭ وڭتۇستىك وڭىرلەرىنە تاراتىلاتىنىن، ال بۇل باعىتتاعى جۇمىس كەلەسى جىلى سولتۇستىك قازاقستاندا جالعاساتىنىن تىلگە تيەك ەتتى.
«قازان ايىندا سيفرلى تەلەراديوحابار تاراتۋ بويىنشا پيلوتتىق جوبا باستالىپ كەتتى. بۇل تاجىريبە جەتكىلىكتى دەڭگەيدە ءساتتى دەپ ايتا الامىز. شىنىن ايتقاندا، بۇل جۇمىستى ءبىز توقسانىنشى نەمەسە ەكى مىڭىنشى جىلداردىڭ باسىندا باستاۋىمىز كەرەك ەدى. سەبەبى، تەگىن كابەلدى تەلەۆيدەنيە تاراتۋ ماسەلەسىنە ماڭىز بەرىلدى. ءبىز حالىققا جوعارى ساپالى تەگىن تەلەۆيدەنيەنى جەتكىزە ءبىلۋىمىز كەرەك. بۇرىن ەكى نەمەسە ءۇش ارنا عانا كورسەتەتىن اۋىلداردا قازىر كورسەتىلەتىن ارنالاردىڭ سانى 15-كە دەيىن جەتتى. وبلىس ورتالىقتارىندا 30 ارناعا دەيىن كورسەتىلىپ تۇر. ادامدار كابەلگە قوسىلماي-اق سيفرلىق فورماتقا اۋىسا الادى. قازىر تالداۋ جۇمىستارى جۇرگىزىلىپ جاتىر. مەنىڭ ويىمشا، قازاقستان ءۇش جىلدىڭ ىشىندە تولىعىمەن سيفرلى تەلەۆيدەنيەگە اۋىسادى»، - دەدى داۋرەن ابايەۆ.