شوبەرەلەرىمىزگە دە قىزمەت ەتەتىن جول سالدىق - ق ر پرەزيدەنتى
«ءبىزدىڭ جەر كولەمىمىز وتە ۇلكەن، 2,7 ميلليون شارشى شاقىرىمدى قۇرايدى، الەمدە 9- ورىندامىز. وسى ۇلان- عايىر جەردە جولدىڭ ءبارى كەڭەس وداعىنا قاراي سالىنعان. وڭىرلەر ءبىر- بىرىمەن جولدار ارقىلى جالعانعان جوق بولاتىن. مەن سوندىقتان ينفراقۇرىلىمدىق باعدارلاما جايىندا ايتتىم. سوڭعى 5 جىلدا بۇكىل قازاقستان بويىنشا ءبىزدىڭ شوبەرەلەرىمىزگە دە قىزمەت ەتەتىن 4500 شاقىرىم مۇلدەم جاڭا تەمىر- بەتوندى جول سالدىق. تاعى دا جالعاستىرا بەرەمىز. 2020 -جىلعا دەيىن قازاقستاندا 17 مىڭ شاقىرىم زاماناۋي اۆتوموبيل جولى سالىنىپ، جوندەلەتىن بولادى»، - دەدى مەملەكەت باسشىسى.
ەلباسىنىڭ ايتۋىنشا، مۇنداي جولدار وڭىرلەر اراسىنداعى بايلانىستاردى جىلدامداتىپ، تاۋار قۇنىنىڭ تومەندەۋىنە سەپتىگىن تيگىزەتىن بولادى.
«ءبىز 2500 شاقىرىم تەمىر جول سالدىق. ەستەرىڭىزدە بولسا، بۇكىل كەڭەس وداعى بايكال- امۋر ماگيسترالىن سالامىز دەپ شۋلاعان بولاتىن. ول كەزدە وداقتىق ۇكىمەتتىڭ مۇشەسى ەدىم. ول نەبارى 400 شاقىرىم جول عانا. بۇكىل كەڭەس وداعى جۇمىلدىرىلدى. ءبىز دابىرا قىلماي، ايعايلاماي- اق سالدىق. ەندى كەلەسى كەزەكتە وبلىس ىشىلىك، اۋدان ىشىلىك جولداردى قاراۋ كەرەك. ەگەر جول ۇيىڭە دەيىن جەتپەيتىن بولسا، وندا ونى جول دەپ مويىندامايمىز. ءبىراق، قىزىعىن كورىپ ءجۇرمىز»، - دەدى ەلباسى.
ق ر پرەزيدەنتى ۇزاقتىعى شامامەن 3 مىڭ شاقىرىم بولاتىن «باتىس ەۋروپا- باتىس قىتاي» اۆتوجولى الماتى، جامبىل، وڭتۇستىك قازاقستان، اقتوبە وبلىستارىنىڭ اۋماعىن باسىپ وتەتىندىگىن ايتتى.
«قاشان مۇنداي جولمەن ءجۇرىپ كورىپ ەدىڭىزدەر؟ ەشقاشان جۇرگەن جوقسىزدار»، - دەدى ن. نازاربايەۆ.
اۆتور: مارلان جيەمباي