تاشكەنتتىك دەلەگاتسيا ەلورداداعى دوستىق ءۇيىن تاماشالادى

استانا. قازاقپارات - وزبەكستان رەسپۋبليكاسىنىڭ ولي ءماجىلىسىنىڭ زاڭ شىعارۋشى پالاتاسى دەلەگاتسياسىنىڭ رەسمي ساپارى اياسىندا استانا قالاسى قازاقستان حالقى اسسامبلەياسى وكىلدەرىمەن كەزدەسۋى ءوتتى، دەپ حابارلايدى استانا قالاسى اكىمدىگىنىڭ رەسمي سايتى.

ەرمەك امانشايەۆ قوناقتى قازاقستان حالىق اسسامبلەياسىنىڭ قالالىق ورتالىعى، دوستىق ءۇيى جانە 2007-جىلى قۇرىلعان استانا قالاسى وزبەك ەتنومادەني ورتالىعىنىڭ جۇمىسىمەن تانىستىردى.

«وزبەك ەتنومادەني ورتالىعى قالاداعى وتە بەلسەندى ورتالىقتاردىڭ ءبىرى. وسى جىلى استانا قالاسىنىڭ 20 جىلدىعىن اتاپ وتتىك، الدىڭعى جىلى «ەكسپو-2017» حالىقارالىق كورمەسى ءوتتى. بۇل ورتالىق اركەز بەلسەندى جانە ءتۇرلى شارالار وتكىزەدى. قازىرگى تاڭدا ورتالىقتا ەكى ونەر ۇجىمى بار. ولار: «پويتاحت» ۆ ا ا جانە «استانا عۋنچالاري» ءبي ءانسامبلى. ولاردىڭ شەبەرلىگى حالىقارالىق، رەسپۋبليكالىق جانە استانالىق سىيلىقتارمەن جانە ناگرادالارمەن ماراپاتتالدى»، - دەپ اتاپ ءوتتى اكىمنىڭ ورىنباسارى.

ال 2017-جىلى «زيە» وزبەك جەكسەنبىلىك مەكتەبى مەملەكەتتىك قولداۋ الدى. ول 53№  مەكتەپ-ليتسەي بازاسىندا جۇمىس ىستەيدى.

«بۇل جەكسەنبىلىك مەكتەپتە ءار ءتۇرلى جاستاعى بالالار وزبەك ءتىلى مەن ءداستۇرىن، مادەنيەتىن وقيدى. ەكى توپ قۇرىلعان. وقۋشىلاردىڭ سانى جىل سايىن ارتۋدا. ءۇش مۇعالىم جۇمىس ىستەيدى. ەتنومادەني ورتالىقتا «استانا عۋنچالاري» جاستار قاناتى قۇرىلعان، ونىڭ قۇرامىندا ستۋدەنتتەر مەن وقۋشىلار بار. بەلسەندىلەردىڭ جالپى سانى - 100 دەن استام ادام»، - دەپ تولىقتىردى ول.

وزبەكستان رەسپۋبليكاسى ولي ءماجىلىسىنىڭ زاڭ شىعارۋشى پالاتاسىنىڭ سپيكەرى نۋردينجون يسمويلوۆ ءتۇرلى ۇلتتاردىڭ ەتنومادەني ورتالىقتارى مەن وزبەك ەتنومادەني ورتالىعىنىڭ دامۋى ءۇشىن جاعداي جاسالعانى ءۇشىن العىسىن ءبىلدىردى.

«جاڭا عانا ەستىدىم، ءسىز ءبىزدىڭ ورتالىققا ماتەريالدىق جانە ۇيىمداستىرۋشىلىق كومەك كورسەتەدى ەكەنسىز. بۇل - ۇلكەن ءىس، وسىنداي قامقورلىق كورسەتىپ جاتقانىڭىزعا سىزگە كوپ راحمەت، ءبىز وتە قۋانىشتىمىز!»، - دەدى ن. يسمويلوۆ.

ەسكە سالا كەتەيىك، بۇگىن استاناعا وزبەكستان ولي ءماجىلىسىنىڭ زاڭ شىعارۋشى پالاتاسىنىڭ سپيكەرى نۋردينجون يسمويلوۆ باستاعان دەلەگاتسيا كەلدى.