قازاقستانداعى وزبەكستان جىلى: قىزىلوردادا وزبەك ونەرپازدارى ءان شىرقادى

قىزىلوردا. قازاقپارات - قىزىلوردا قالاسىنداعى «دوستىق ۇيىندە» وزبەكستاننىڭ ناۆوي وبلىسىنان كەلگەن ونەرپازدار جەرگىلىكتى جۇرتشىلىققا ءوز تارتۋىن جاسادى.

بۇل شارا بيىل اتاپ ءوتىلىپ جاتقان قازاقستانداعى وزبەكستان جىلى اياسىندا قولعا الىنىپ وتىر، دەپ حابارلايدى قازاقپارات ءتىلشىسى.

كورشىلەس قونعان تۋىس حالىق «قانى ءبىر ەلىم، جانى ءبىر ەلىم» اتتى كونسەرتتىك باعدارلاماسىندا وزبەك اندەرى مەن بيلەرىن ناقىشىنا كەلتىرە ورىندادى. سونداي-اق، سول ەلدەگى قازاق ونەرپازدارى دا ءان مەن كۇيدەن شاشۋ شاشتى. كونسەرتتىك باعدارلامادا 20 عا جۋىق ونەرپاز ەلدىڭ قوشەمەتىنە بولەندى.

«سىر ءوڭىرى تۇرعىندارىنىڭ قوناقجاي قاسيەتى بىزگە وتە ۇنادى. بۇل جاعىنان ءبىر-بىرىمىزگە وتە ۇقساسپىز. سونداي-اق، قوس حالىقتىڭ مادەنيەتى مەن سالت-داستۇرىندە ەرەكشە ايىرماشىلىق جوق ەكەنى بەلگىلى. ءبىز قازاقستانداعى وزبەكستان جىلى اياسىندا باسقا دا شارالاردى جوسپارلاپ وتىرمىز. استانا قالاسىندا وزبەكتىڭ ۇلتتىق كيىمدەرى مەن مادەنيەتىنە ارنالعان كورمە وتكىزۋ ويلاستىرىلعان»، - دەدى ناۆوي وبلىسى اكىمىنىڭ ورىنباسارى ۋلۋگبەك سافاروۆ.

قازاقستانداعى وزبەكستان جىلى اياسىندا ەلىمىزدە 200 دەن استام شارا وتكىزۋ جوسپارلانعان. مۇنداي يگى شارالار نەگىزىنەن ەلىمىزدىڭ وڭتۇستىك بولىگىندەگى تاراز، شىمكەنت، تۇركىستان جانە قىزىلوردا قالالارىندا وتكىزىلىپ كەلەدى.