قازاقستاندىق فيلم پورتۋگاليادا باس جۇلدە الدى
بۇل تۋرالى قازاقپارات قازاق فيلم كينوستۋدياسىنىڭ باسپا ءسوز قىزمەتىنە سىلتەمە جاساپ.
فەستيۆالدىڭ «ۇزدىك فيلم» جۇلدەسى قازاقستاندىق رەجيسسەر ەمير بايعازيننىڭ «وزەن» فيلمىنە بۇيىردى. اتالعان كينوتۋىندى فەستيۆالدىڭ نەگىزگى كونكۋرسىنا قاتىسىپ، ەۋروپا، ازيا، سولتۇستىك جانە وڭتۇستىك امەريكا ەلدەرىنىڭ فيلمدەرىمەن ۇزدىك اتانۋعا تالاستى.
«ۇزدىك فيلم ءۇشىن باس جۇلدەمەن ەمير بايعازيننىڭ «وزەن» فيلمى ماراپاتتالادى. ەرەكشە مانەردە تۇسىرىلگەن تاماشا فيلم. بۇل تۋىندى ءبىزدى وزەكتىلىگىمەن، جوعارى دەڭگەيىمەن ءبىرىنشى كادردان- اق تاڭقالدىردى، - دەدى ساحنا تورىنەن قازىلار القاسىنىڭ مۇشەسى مارتا ارگەريح.
ايتا كەتسەك، قازىلار القاسىنىڭ قۇرامىنا ونەردىڭ ءتۇرلى سالالارىندا جۇمىس ىستەيتىن قايراتكەرلەر كىردى، ولار: ۋولتەر ساليس جانە دجوناتان ليتتەل ەسىمدى رەجيسسەرلەر، امەريكاندىق اكتريسا جانە ءانشى كريستا بەلل، ارگەنتينالىق پيانيست مارتا ارگەريح، ديريجەر سيتۆەن كوۆاچەۆيچ جانە سۋرەتشى دجوردج كۋەروس.
جالپى LEFFEST كينوفەستيۆالىندە بار جوعى ءۇش جۇلدە - «ۇزدىك فيلم» (كينو تىلىندەگى ەڭ يننوۆاتسيالىق جانە كوركەم تۇسىرىلگەنى ءۇشىن)، «قازىلار القاسىنىڭ ۇلكەن جۇلدەسى» (كوركەمدىك جاعىنان ەرەكشەلەنگەنى ءۇشىن) جانە «ارنايى جۇلدە» تابىستالادى.
ايتا كەتسەك، ەمير بايعازيننىڭ «اسلاننىڭ ساباقتارى» فيلمى 2013 -جىلى فەستيۆالدىڭ «قازىلار القاسىنىڭ ۇلكەن سىيلىعى» جۇلدەسىمەن ماراپاتتالعان بولاتىن.
سونىمەن قاتار، فەستيۆالدىڭ ماراپاتتاۋ راسىمىندە «الەمدىك كينەماتوگرافقا قوسقان ۇلەسى» جۇلدەسى وتاندىق رەجيسسەر دارەجان ومىربايەۆقا تابىستالدى. بۇل فەستيۆالدە رەجيسەردىڭ رەتروسپەكتيۆاسى ۇيىمداستىرىلعان بولاتىن.
«وزەن» فيلمىنىڭ الەمدىك تۇساۋكەسەرى ۆەنەتسيا كينوفەستيۆالى شەڭبەرىندە وتكەن بولاتىن. بۇل فەستيۆالدىڭ «كوكجيەكتەر» باعدارلاماسىندا ەمير بايعازين ۇزدىك رەجيسسەر اتاندى. ال ءفيلمنىڭ سولتۇستىك اميريكاداعى تۇساۋكەسەرى ۇستىمىزدەگى جىلى قىركۇيەك ايىندا حالىقارالىق تورونتو كينوفەستيۆالى اياسىندا ءوتتى.
كينوتۋىندى فەستيۆالدىڭ «تۇعىرناما» («پلاتفورما») كونكۋرستىق باعدارلاماسىندا كورسەتىلىپ، قازىلار القاسىنىڭ قۇرمەتتى اتالىمىنا جانە Screen Daily تاۋەلسىز كينوسىنشىلاردىڭ رەيتينگىسى تىزىمىندە الدىڭعى قاتاردان كورىندى. جىل سايىن وتەتىن 12-شى Asia Pacific Screen Awards سالتاناتىندا «وزەن» فيلمى «رەجيسسۋراداعى تابىسى ءۇشىن» سىيلىعىمەن ماراپاتتالدى. فيلمنىڭ ازيالىق تۇساۋكەسەرى توكيو كينوفەستيۆالىنىڭ كونكۋرستىق باعدارلاماسى اياسىندى ءوتتى.
ال لوس-اندجەلەستەگى Asian World Film Festival كينوفەستيۆالىندە «وزەن» فيلمى قازىلار القاسىنىڭ جۇلدەسىنە - «ناعىز كينو تىلىمەن بەينەلەنگەن كوڭىلىڭدى بىردەن باۋراپ الاتىن فيلم» جۇلدەسىنە يە بولدى.
ەسكە سالا كەتسەك، بۇعان دەيىن الەمنىڭ 6 رەجيسسەرى Hollywood Foreign Press Association ۇيىمىنىڭ ءبىرىنشى رەزيدەنتتىك گرانتىنا يە بولعانىن حابارلاعان بولاتىنبىز. ولاردىڭ قاتارىنا ۆەنەتسيا كينوفەستيۆالىنىڭ «كوكجيەكتەر» (گوريزونتى) باعدارلاماسىندا «ۇزدىك رەجيسسەر» اتالىمى بويىنشا جۇلدەگەر بولعان ەمير بايعازين دە ەنگەن ەدى.