دانيار ەلەۋسىنوۆتىڭ پروفي-رينگتەگى رەيتينگى جوعارىلادى
بۇل تۋرالى ۆكونتاكتە الەۋمەتتىك جەلىسىندەگى «قازاقستاننىڭ كاسىبي بوكسى» پاراقشاسىندا جازىلعان، دەپ حابارلايدى قازاقپارات.
بۇعان دەيىن حابارلاعانىمىزداي، قازاقستاندىق قوس بوكسشى «كازينو دە مونتە-كارلوداعى» شوۋدىڭ اندەركارتىندا نيكاراگۋالىق قارسىلاستارىن ءۇشىنشى راۋندتا نوكاۋتپەن جەڭدى. ەلەۋسىنوۆ ماركوس موحيكامەن (16-3-2, 12 ك و)، ال زاۋىربەك دجونسون تەللەسپەن (12-45-5، 6 ك و) كەزدەستى.
ەلەۋسىنوۆ BoxRec سايتىنىڭ جاڭارتىلعان رەيتينگىندە (جارتىلاي ورتا سالماقتا) 231 دەن 184-ورىنعا، ال زاۋىربەك (ەكىنشى جارتىلاي جەڭىل سالماقتا) 787 دەن 641-ورىنعا كوتەرىلدى. جارتىلاي ورتا سالماق ساناتىندا BoxRec رەيتينگىنە 1987 بوكسشى، ال ەكىنشى جارتىلاي جەڭىل سالماقتا 1476 ەنگەن.
بۇل، ريو-2016 وليمپياداسىنىڭ چەمپيونى، 27 جاستاعى ەلەۋسىنوۆتىڭ كاسىبي رينگتەگى بەسىنشى ايقاسى، ال اۋەسقوي بوكستا جاستار اراسىنداعى الەم چەمپيونى بولعان 22 جاستاعى زاۋىربەك ءۇشىن - ەكىنشى جەكپە-جەك.
ايتا كەتەيىك، «كازينو دە مونتە-كارلوداعى» باستى ايقاستا ءبىرىنشى اۋىر سالماقتاعى بۇرىنعى الەم چەمپيونى رەسەيلىك دەنيس لەبەديەۆ (32-2، 23 ك و) تورەشىلەردىڭ شەشىمىمەن امەريكالىق مايك ۋيلسوندى (19-1، 8 ك و) جەڭدى.