ەلوردا تۇرعىنى مەكتەپتەن بالا ۇرلاۋ كۇدىگىنە ىلىكتى
وقيعا ەلورداداعى №79 مەكتەپتە بولعان.
«قايرىلى كەش، اتا- انالار! بارلىقتارىڭىزدى ەسكەرتكىم كەلەدى. بۇگىن كەشكىسىن مەكتەپتىڭ جانىندا قورقىنىشتى جايت ورىن الدى. مەكتەپتىڭ قاقپاسىنا قاراما- قارسى جەردە كولىك ىشىندە كىشكەنتاي بالاممەن قىزىمدى كۇتىپ وتىرعانمىن. بالامنىڭ مەكتەپتەن شامامەن 40 جاستاعى اياعىن سىلتىپ باسقان اداممەن بىرگە شىققانىن، ونىمەن بىردەڭە جايلى سويلەسىپ كەلە جاتقانىن بايقادىم. قىزىم كولىگىمدى كورمەي، ونىمەن بىرگە قۇرىلس الاڭىنا قاراي بەت الدى. كولىكتەن اتىپ شىعىپ، ايعاي سالدىم. ول قورقىپ، قاشىپ كەتتى. قاي باعىتقا كەتكەنىن دە بايقامادىم. قىزىما جەتىپ بارسام، ول گيپنوزعا تۇسكەندەي، ەشتەڭە ايتا الماي، كوزدەرىن عانا جىپىلىقتاتتى. ۇيدە ۇنەمى بەيتانىس ادامدارمەن سويلەسپەۋ كەرەكتىگىن، قالاي الداسا دا ونىمەن ەرمەۋ كەرەكتىگىن ىلعى ايتىپ وتىرامىن. مەكتەپكە شىعار الدىندا حابارلاسىپ، اتالعان جەردە كۇتەتىنىمدى دە ايتقانمىن. اباي بولىڭىزدارشى. مۇنداي ادامداردان بالالارىمىزدى اللا ساقتاسىن» ، - دەپ جازدى «Whats App» مەسسەندجەرىنە وقۋشىنىڭ اناسى.
ول سونداي- اق ەر ادامنىڭ بەينەسى كورسەتىلگەن ۆيدەونى دا تاراتقان. ۆيدەوجازبا مەكتەپتىڭ كۇزەت قىزمەتىنەن الىنعان.
كەيىننەن انىقتالعانداي، اتالعان ەر ادامدى كورشىسى قىزىن مەكتەپتەن الىپ كەتۋگە وتىنگەن. ول كەلىسكەن. ءبىراق، مەكتەپكە كەلگەندە ونى باسقا وقۋشىمەن شاتاستىرعان. وسى جايتقا وراي استانا قالالىق ءبىلىم باسقارماسى تۇسىنىك بەردى.
«ۆيدەوداعى ەركەك - كورشىسىنىڭ وتىنىشىمەن ءوزىنىڭ بالاسىنا قوسىپ كورشىسىنىڭ دە قىزىن الا كەتپەك بولعان اتا- انا. ونىڭ اتىن اتاپ، كەيىن ەسىكتىڭ الدىندا كۇتىپ تۇرعان. سول كەزدە مەكتەپتەن باسقا قىز شىعىپ، ونى كورشىسىنىڭ قىزى دەپ ويلاعان. الايدا، قىز اناسىنىڭ كولىگىنە قاراي بەتتەگەندە ول دا سوڭىنان ەرگەن. سول جەردە ونىڭ باسقا بالا ەكەندىگىن اتا- اناسىنان بىلگەن» ، - دەدى باسقارمادان.
ۆەدومستۆونىڭ اتاپ وتۋىنشە، ۆيدەو اۆتورى - وقۋشى قىزدىڭ اناسى مەكتەپ اكىمشىلىگى تاراپىنان جاۋاپتى كۇتپەستەن ونى ورتاق چاتقا سالىپ جىبەرگەن.
«مەكتەپ باسشىلىعىنا ەسكەرتۋ جاسالدى. ويتكەنى، 1-سىنىپتاردىڭ سىنىپ جەتەكشىلەرى بالالاردى مۇنداي توسىن جايتتار ورىن الماۋى ءۇشىن تىكەلەي اتا- انالارىنا/زاڭدى وكىلدەرىنە عانا تابىستاۋى ءتيىس. سونىمەن بىرگە بالالار اراسىندا قاۋىپسىزدىك ەرەجەسى بويىنشا نۇسقاۋلىق جۇرگىزۋ تاپسىرىلدى» ، - دەپ اتاپ ءوتتى ءبىلىم باسقارماسىنان.
ايتا كەتەيىك، كوپ ۇزاماي «Whats App» مەسسەندجەرىندە بالانىڭ اناسىنىڭ جانە بالا ۇرلاۋ كۇدىگىنە ىلىگە جازداعان ازاماتتىڭ فوتوسى تارادى. سۋرەت استىندا قاتتى قورىققان ەركەكتىڭ مەكتەپكە ءوزى كەلگەندىگى جانە بارلىعى ودان كەشىرىم سۇراعانى جازىلعان. سونىمەن قاتار اتالعان ازاماتتىڭ بۇعان دەيىن ينسۋلت العاندىعى، بۇل جولى دا جۇرەك ۇستاماسى قايتالانا جازداعانى ايتىلعان.