نۇرسۇلتان نازاربايەۆ ك ي م ە پ ۋنيۆەرسيتەتىنىڭ باسشىسىمەن كەزدەستى

استانا. قازاقپارات - مەملەكەت باسشىسى «ك ي م ە پ ۋنيۆەرسيتەتى» اكسيونەرلىك قوعامىنىڭ پرەزيدەنتى چان يان بەنگتى قابىلدادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

كەزدەسۋ بارىسىندا نۇرسۇلتان نازاربايەۆقا ك ي م ە پ ۋنيۆەرسيتەتىنىڭ قازىرگى جۇمىسى جانە وسى وقۋ ورنىن دامىتۋ جوسپارىنىڭ ىسكە اسىرىلۋى جونىندە مالىمەت بەرىلدى.

قازاقستان پرەزيدەنتى قازىرگى زامان ەكونوميكاسىنىڭ تالاپتارىنا ساي بىلىكتى ماماندار دايىنداۋ ىسىندەگى ۋنيۆەرسيتەت جۇمىسىنىڭ تيىمدىلىگىن اتاپ ءوتتى.

- ۋنيۆەرسيتەت 1992-جىلى قۇرىلعان. وسى جىلدار ىشىندە 12 مىڭعا جۋىق ستۋدەنت وقۋىن ءبىتىرىپ شىقتى. بۇگىندە مۇندا الەمنىڭ ءارتۇرلى ەلدەرىنەن كەلگەن وقىتۋشى-پروفەسسورلار قۇرامى ەڭبەك ەتەدى. 29 ءبىلىم باعدارلاماسى بويىنشا 2109 ستۋدەنت اقىلى نەگىزدە وقىپ جاتىر، - دەدى ەلباسى.

چ. بەنگ ۋنيۆەرسيتەت تۇلەكتەرىنىڭ 93 پايىزى وقۋ بىتىرگەن سوڭ 6 ايدىڭ ىشىندە جۇمىسقا ورنالاساتىنىن ايتتى.

سونىمەن قاتار، «ك ي م ە پ ۋنيۆەرسيتەتى» اكسيونەرلىك قوعامىنىڭ پرەزيدەنتى بيىل وقۋ ورنى ءبىلىم بەرۋ ساپاسىن قامتاماسىز ەتۋ جونىندەگى تاۋەلسىز اگەنتتىكتىڭ تۇجىرىمى بويىنشا عىلىم جانە ءبىلىم سالاسىن دامىتۋ ىسىندە ۇزدىك دەپ تانىلعانىن اتاپ ءوتتى.