استانالىق وقۋشىلارعا وتاندىق فيلمدەر تەگىن كورسەتىلۋدە

استانا. قازاقپارات - وسكەلەڭ ۇرپاق قازاق حالقىنىڭ تاريحى مەن مادەنيەتىن تانىپ- ءبىلۋى ءۇشىن ەلوردالىق وقۋشىلارعا «ۇلى دالانىڭ مۇراسى» كينوجوباسى ۇيىمداستىرىلدى، دەپ حابارلايدى «قازاقپارات» قالا اكىمدىگىنىڭ سايتىنا سىلتەمە جاساپ.

جوبا اياسىندا 22 - قاراشادان باستاپ استانا قالاسىنىڭ بارلىق كينوتەاترلارىندا 5-11 سىنىپ وقۋشىلارى ءۇشىن قازاقتىڭ بولمىسى مەن ءداستۇرى پاش ەتەتىن «جاۋجۇرەك مىڭ بالا»، «الماس قىلىش»، «اناعا اپارار جول»، «جەرۇيىق»، «قۇنانباي»، «جۇلدىزدار توعىسقاندا» وتاندىق فيلمدەرى تەگىن كورسەتىلەدى.

«جاستارعا كورسەتىلەتىن بارلىق تۋىندىلار - تاريحي فيلمدەر جانە بۇل بەكەر ەمەس. مەملەكەت باسشىسى «ۇلى دالانىڭ جەتى قىرى» ماقالاسىندا ۇلتتىق تاريحتى ءبىلىپ- تانۋدىڭ ماڭىزىن ەرەكشە اتاپ ءوتتى»، - دەدى استانا قالاسى قوعامدىق دامۋ ىستەرى باسقارماسىنىڭ باسشىسى دانيار ەسين.

ول تاريح ءۇشىن نامىس جانە پاتريوتيزم سەزىمىن وياتۋ مەكتەپ قابىرعاسىنان باستالۋى تيىستىگىن اتاپ ءوتتى. «ءبىزدىڭ ويىمىزشا، وتاندىق كينەماتوگراف ارقىلى وقۋشىلارىمىز قازاق حالقىنىڭ ەجەلگى عاسىرلاردان قالىپتاسقان قۇندىلىقتارىن تەرەڭ سەزىنە الادى»، - دەپ اتاپ ءوتتى ول.

كەشە «كەرۋەن» ساۋدا، ويىن- ساۋىق ورتالىعىندا «جاۋجۇرەك مىڭ بالا» كينوكارتيناسى كورسەتىلىپ، ونى بىردەن بىرنەشە مەكتەپتىڭ وقۋشىلارى تاماشالادى.

«وسكەلەڭ ۇرپاق ءۇشىن كينو - تاريحي قۇندىلىقتاردى العا جىلجىتۋدىڭ ەڭ ۇزدىك ارناسى. فيلمدەر ارقىلى بالالار جارقىن تاريحي مىسالدارعا نازار اۋدارىپ، وتانعا دەگەن ناعىز ماحابباتتىڭ، جاقىندارى مەن دوستارىنىڭ قۇرمەتى مەن قولداۋى نە ەكەنىن تۇسىنەدى»، - دەپ اتاپ ءوتتى د. ەسين.

كينوفيلمدەردى 2018 -جىلدىڭ سوڭىنا دەيىن كورسەتۋ جوسپارلانىپ وتىر. ولارعا قالانىڭ بارلىق مەكتەپ وقۋشىلارى قاتىسادى. ۇيىمداستىرۋشى - استانا قالاسىنىڭ اكىمدىگى.