سامات سماقوۆ «اقتوبە» فۋتبول كلۋبىن نەگە ساتىپ العانىن ءتۇسىندىردى

اقتوبە. قازاقپارات - سامات سماقوۆ «اقتوبە» ف ك قارىزىن قايتارۋ ءۇشىن ارنايى كەستە جاسالاتىنىن ايتتى، دەپ حابارلايدى قازاقپارات ءتىلشىسى.

بۇگىن سامات سماقوۆتىڭ «اقتوبە» ف ك ساتىپ العانىن رەسمي جاريالاعان بولاتىن.

«اقتوبە» ف ك سەنىمگەرلىك باسقارۋعا الماس بۇرىن ماماندارمەن اقىلداستىم. سەبەبى، ءوزىم فۋتبولشى بولعانىممەن باسقارۋشىلىق تاجىريبەم از. ءارى وتباسىممەن، اتا-اناما ايتتىم. ءبىر جاعىنان «اقتوبەنى» تاراتىپ جىبەرۋگە جول بەرگىم كەلمەدى. كلۋب تاريحى تەرەڭ، جەتىستىككە جەتۋ ءۇشىن قانشاما تەر توگىلدى. شىنىن ايتقاندا، وزگە كلۋب بولعاندا سەنىمگەرلىك باسقارۋعا الماس ەدىم»، - دەدى سامات سماقوۆ بۇگىن وتكەن باسپا ءسوز ءماسليحاتىندا.

كلۋبتىڭ جاڭا يەسى بالالار اراسىنداعى فۋتبولدى دامىتۋ جوسپارلاپ وتىر. كەلەر جىلى بالالار فۋتبول اكادەمياسى اقىلى بولادى. تەك از قامتىلعان وتباسىنان شىققان بالالار فۋتبولمەن تەگىن شۇعىلدانادى. فۋتبول اكادەمياسى وسى ارقىلى تابىس تاۋىپ، ءوز شىعىنىن وتەيدى.

«سەنىمگەرلىك باسقارۋعا بەرگەندە قارىزى قوسا الىندى. قازىر قارىزدىڭ ناقتى سوماسىن ايتا المايمىن. ءبىر سوزبەن ايتقاندا وتە كوپ. سوندىقتان قارىزدى قايتارۋ ءۇشىن 2019 -جىلى ارنايى كەستە بولادى. ءبىز سول كەستەگە ساي قارىزدى قايتارامىز. قازاقستاندىق فۋتبولشىلار مەنى تانيدى. ولارمەن كەلىسىمگە كەلۋ، اقىلداسۋ جەڭىل. ءبىز ءۇشىن لەگيونەرلەر ەڭ قيىن جۇمىس بولىپ تۇر. قازىر دەمەۋشىلەردى ىزدەپ، قوسىمشا تابىس تابۋ جۇمىستارى ءجۇرىپ جاتىر. قازاقستاندا فۋتبولمەن تابىس تابۋ قيىن. ءبىراق ءبىز سەكىلدى جانكۇيەرى بار كلۋبتىڭ تابىس تابۋعا مۇمكىندىگى بار»، - دەدى سامات سماقوۆ.