اعزالارىنىڭ اۋىستىرىلۋى قاجەت ناۋقاستار ەندى شەتەلگە جىبەرىلمەيدى
سەبەبى قازاقستاندا جۇرەكتى اۋىستىرىپ سالۋدى قاجەت ەتىلەتىن بالالاردى قوسپاعاندا اعزالاردى ترانسپلانتاتسيالاۋ تۇرلەرىنىڭ بارلىق سپەكترى جۇرگىزىلەدى.
بۇل تۋرالى Facebook-تەگى «پوموشنيك مينزدراۆا» پاراقشاسىندا جازىلدى، دەپ حابارلايدى قازاقپارات.
«قازاقستاننىڭ تاۋەلسىزدىك العان جىلدارى ىشىندە وتاندىق ترانسپلانتاتسيانىڭ ايتارلىقتاي دامىعانى بايقالادى. قازىرگى ۋاقىتتا قازاقستاننىڭ ترانسپلانتاتسيا ورتالىقتارى دونورلىق اعزالاردى اۋىستىرىپ سالۋدى تابىستى جۇرگىزۋدە، بۇل وتاندىق مامانداردىڭ كورسەتىپ وتىرعان مەديتسينالىق قىزمەتى ساپاسىنىڭ جوعارى دەڭگەيىن راستايدى»، - دەلىنگەن حابارلامادا.
قازاقستان رەسپۋبليكاسىنىڭ قولدانىستاعى زاڭناماسىنا سايكەس اعزالاردى ترانسپلانتتاۋدى ورىنداۋ ءۇشىن دەنساۋلىق ساقتاۋ سۋبەكتىسى ەكى ولشەمشارتقا سايكەس كەلۋى، ياعني ترانسپلانتاتسيا بويىنشا ليتسەنزياسىنىڭ بولۋى، ترانسپلانتاتسيا جۇرگىزۋگە رۇقسات ەتىلگەن مەديتسينالىق ۇيىمداردىڭ تىزبەسىنە ەنۋى ءتيىس.
بۇكىل الەمدە ادامنىڭ دونورلىق اعزالارىن اۋىستىرىپ سالۋمەن بايلانىستى ترانسپلانتتاۋدى ادامنىڭ دونورلىق اعزالارىن ترانسپلانتتاۋ جانە ولاردىڭ اينالىمى سالاسىنداعى قىلمىسقا جول بەرمەۋ ماقساتىندا دەنساۋلىق ساقتاۋ سالاسىنداعى ۋاكىلەتتى ورگان باقىلايدى.
ۋاكىلەتتى ورگان بەكىتەتىن ترانسپلانتاتسيا جۇرگىزۋگە رۇقسات ەتىلگەن مەديتسينالىق ۇيىمداردىڭ تىزبەسى مەملەكەتتىڭ وسى سالاداعى تىكەلەي باقىلاۋىن ايقىندايدى.
قازىرگى ۋاقىتتا دەنساۋلىق ساقتاۋ مينيسترلىگىنىڭ باستاماسى بويىنشا پروكۋراتۋرا ورگاندارىمەن بىرلەسىپ رەسپۋبليكامىزدىڭ 5 وڭىرىندە 11 ترانسپلانتاتسيا ورتالىعىن تەكسەرۋ جۇرگىزىلۋدە. تەكسەرۋ پاتسيەنتتەردىڭ قاۋىپسىزدىگىن قامتاماسىز ەتۋ جانە قازاقستان رەسپۋبليكاسىنىڭ نورماتيۆتىك قۇقىقتىق اكتىلەرىنىڭ تالاپتارىن ساقتاۋ ماقساتىندا باستاماشىلىق ەتىلدى.