يۋري راتاسا: ەستونيا ءۇشىن قازاقستانمەن ىنتىماقتاستىقتىڭ كەلەشەگى زور
سونىمەن قاتار، ول قازاقستان ۇكىمەتىنىڭ باسشىسى باقىتجان ساعىنتايەۆپەن ەكىجاقتى كەزدەسۋدەگى اڭگىمەسىن دە ەرەكشە اتاپ ءوتتى، دەپ حابارلايدى قازاقپارات ءتىلشىسى.
«بىرىنشىدەن، بۇگىن قازاقستان پرەمەر-مينيسترىمەن ەكىجاقتى كەزدەسۋىم وتە ءتيىمدى ءارى جەمىستى بولعانىن اتاپ وتكىم كەلەدى. ءبىز قازاقستان مەن ەستونيا ىنتىماقتاستىعىنىڭ ءتۇرلى اسپەكتىلەرىن تالقىلادىق. سيفرلاندىرۋ، ءبىلىم بەرۋ مەن اۋىل شارۋاشىلىعى تۋرالى اڭگىمەلەستىك. سونىمەن قاتار، قازاقستان مەن ەستونيا اراسىنداعى قارىم-قاتىناستار باعىتىنداعى «ءبىر بەلدەۋ، ءبىر جول» باستاماسى تۋرالى دا ءسوز قوزعادىق. البەتتە، ەستونيا بۇل باستاماعا قاتىسۋعا قىزىعۋشىلىق بىلدىرەدى، ويتكەنى بۇل ەكى ەلدى تەمىرجولدار ارقىلى بايلانىستىرادى»، - دەپ اتاپ ءوتتى يۋ. راتاسا بيزنەس-فورۋم بارىسىندا.
ونىڭ ايتۋىنشا، قازاقستان مەن ەستونيانىڭ ىنتىماقتاستىعى كەلەشەك قارىم-قاتىناستار ءۇشىن دە زور الەۋەتكە يە.
«18 ميلليون حالقى بار قازاقستان وتە ۇلكەن ەل، مۇناي كەن ورىندارىنا دا باي، ماڭىزدى ساۋدا بايلانىستارىنا دا يە. ەستونيا حالىق سانى از، شاعىن مەملەكەت. وسىنداي ءارتۇرلى ايىرماشىلىقتارىمىز بولعانىنا قاراماستان، ءبىزدىڭ ورتاق مۇددەلەرىمىز دە بارشىلىق. ەكىجاقتى ەكونوميكالىق ءوزارا بايلانىستى كەڭەيتۋگە مۇمكىندىگىمىز مول، بۇلار اسىرەسە IT، كولىك، لوگيستيكا، اۋىل شارۋاشىلىعى جانە ەكولوگيالىق تەحنولوگيالار، قالدىقتاردى باسقارۋ سالالارىندا باسىمدىققا يە دەپ ويلايمىن. بۇل باعىتتاعى ءتىزىم ۋاقىتى كەلگەن سايىن كەڭەيە تۇسەدى دەگەن سەنىمدەمىن»، - دەدى ەستونيانىڭ ۇكىمەت باسشىسى.
ءسوز اراسىندا مارتەبەلى مەيمان Astana Hub-تى ارالاپ كورگىسى كەلەتىنىن دە جەتكىزدى.
«مەن قازاقستان ۇكىمەتىنىڭ جەكە سەكتورمەن بىرلەسە وتىرىپ مەيلىنشە سارالانعان جانە زاماناۋي ەكونوميكالىق مودەل باعىتىن قالىپتاستىرۋعا قاتىستى ۇلكەن ساياسي ەرىك-جىگەرىن بايقاپ وتىرمىن. بۇل رەتتە وزگەرىستەردى تەك اكەلىپ قانا قويماي، ونى ۇدايى قولداۋ قاجەتتىگىن دە تۇسىنەمىن. ەكىنشى جاعىنان ەستونيا ەكونوميكاسى دا ەڭبەكتى كوپ قاجەت ەتەتىن يندۋستريادان كاپيتالدى قاجەت ەتەتىن يندۋسترياعا ترانسفورماتسيالاۋ پروتسەسىنەن ءوتىپ جاتىر. البەتتە بۇل ءداستۇرلى يندۋستريا قۇرىپ كەتەدى دەگەن ءسوز ەمەس، كەرىسىنشە، بۇل ولاردىڭ سيفرلاندىرۋدى، اۆتوماتتاندىرۋ مەن جاڭا تەحنولوگيالاردى قولدانا وتىرىپ بۇرىنعىدان دا ءتيىمدى بولا تۇسەتىنىن قاراستىرادى»، - دەدى يۋ. راتاسا.
ەسكە سالا كەتسەك، بۇگىن ەلوردادا Digital Bridge حالىقارالىق يننوۆاتسيالىق فورۋم ءوتىپ جاتىر.