قازاقستان مەن برازيليا اتوم ەنەرگياسى تۋرالى شارت جاساسپاق

استانا. قازاقپارات - قازاقستان مەن برازيليا اتوم ەنەرگياسى تۋرالى شارت جاساسپاق. بۇل تۋرالى بۇگىن ق ر سىرتقى ىستەر مينيسترلىگىندەگى بريفينگتە قازاقستاننىڭ برازيلياداعى ەلشىسى قايرات سارجانوۆ ايتتى، دەپ حابارلايدى قازاقپارات ءتىلشىسى.

بريفينگ بارىسىندا ەلشى اعىمداعى جىلى «قازاتومونەركاسىپ» كومپانياسى برازيليالىق «ىndْstrias nucleares do Brasil» (INB) كومپانياسىنا تابيعي ۋران كونسەنتراتىن جەتكىزۋ بويىنشا تەندەردە جەڭىپ شىققانىن، كەلىسىم شارتتتارعا سايكەس قازاتومونەركاسىپ بەلگىلەنگەن مەرزىمدە ۋران جەتكىزىپ بەرگەنىن ايتتى.

 «قازاقستانعا ساپارعا شىعار الدىندا INB پرەزيدەنتىمەن كەزدەستىم. ءبىزدىڭ ۇلتتىق كومپانيامەن ىنتىماقتاستىق مۇمكىنشىلىكتەرىن جان- جاقتى تالقىلادىق. برازيليالىق ماماندار قازاقستاندىق ساراپشىلاردى ريو- دە- جانەيروداعى اتوم ستانساسىنا كەلۋگە شاقىرادى جانە قازاقستاندىق تابيعي ۋران كونسەنتراتىن ودان ارى يمپورتتاۋعا مۇددەلىك تانىتىپ وتىر. دەگەنمەن، مۇنداي پروتسەدۋرا برازيليا زاڭناماسىنا سايكەس تەندەر ارقىلى جۇزەگە اسىرىلادى. ولار تەندەردىڭ جاريالاناتىندىعىن نەمەسە جاريالانبايتىندىعىن ازىرشە بىلمەيدى. ءبىراق، ونداي تەندەر جاريا ەتىلە سالىسىمەن ءبىز قاجەتتى قۇجاتتاردى بەرەمىز» ، - دەدى ەلشى.

 سونىمەن قاتار، قايرات سارجانوۆ اتوم ەنەرگياسىن بەيبىت ماقساتتا پايدالانۋ سالاسىنداعى ىنتىماقتاستىق تۋرالى كەلىسىم جوباسى كەلىسىلىپ جاتقانىن ايتتى. جالپى، برازيليا بۇگىندە يادرولىق تەحنولوگيانىڭ تولىق تسيكلىنە يە بولىپ وتىرعان 10 ەلدىڭ ءبىرى سانالادى.

 ايتا كەتەيىك، اعىمداعى جىلدىڭ قاڭتار- تامىزىندا قازاقستان مەن برازيليا اراسىنداعى تاۋار اينالىمىنىڭ كولەمى 82,3 ميلليون دوللاردى قۇرادى. قازاقستان برازيليادان قانت، تاباك، ۇشاق، ماشينا جابدىقتارى مەن ونىڭ بولشەكتەرىن، قۇرىلىس ماتەريالدارىن الادى. ال ەلىمىزدەن برازيلياعا تەمىر مەن كرەمنييدىڭ فەرروقورىتپاسى، پلاستماسس بۇيىمدار، رەزەڭكە مەن قارا مەتالل ەكسپورتتالادى.