وزبەكستاندا قانشا قازاق تۇرادى

استانا. قازاقپارات - وزبەكستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنداعى كافەدرا مەڭگەرۋشىسى مانسۇر بەكمۋرادوۆ ءوز ەلىندە تۇرىپ جاتقان قازاقتار تۋرالى ايتىپ بەردى، دەپ حابارلايدى قازاقپارات.

«وزبەكستاندا 1,5 ميلليوننان استام قازاق ءومىر سۇرۋدە. ءبىزدىڭ ەلدە 100-گە جۋىق قازاقتىڭ ۇلتتىق مادەني ورتالىقتارى قىزمەت ەتۋدە، سونداي-اق 500-دەن استام جالپى ءبىلىم بەرەتىن مەكتەپ بار. اتاپ ايتقاندا، قازاق تىلىندە كادرلار دايارلانىپ جاتىر جانە انسامبلدەر، تەاترلار جاساقتالعان. وسى ورايدا، وزبەكستانداعى قازاقتارعا ءتيىستى جاعدايلار جاسالعان»، - دەدى شەتەلدىك ساراپشى «قازاقستان جانە ورتا ازيا: ەتنوالەۋمەتتىك پروتسەستەر مەن ەتنومادەني بايلانىس» تاقىرىبىندا ق ح ا- نىڭ ورتالىق ازيا عىلىمي ساراپشىلىق كەڭەسىنىڭ وتىرىسىندا.

سونىمەن قاتار، ول جاقىندا جۇرگىزىلگەن الەۋمەتتىك زەرتتەۋ ناتيجەسىنە توقتالدى. وعان سايكەس، وزبەك ۇلتىنا جاتپايتىن تۇرعىنداردىڭ 97 پايىزى وزبەكستاندى وزدەرىنىڭ تۋعان ەلى دەپ سانايتىندىعىن جانە ەشقانداي دا قىسىم بولماعانىن اتاپ وتكەن.

«وزدەرىڭىز بىلەسىزدەر، ورتالىق ازيانىڭ حالىقتارى تولەرانتتىعىمەن، وزگە حالىقتارعا دەگەن سۇيىسپەنشىلىگىمەن، ولاردىڭ مادەنيەتىنە سىيلاستىقپەن قاراۋمەن ەرەكشەلەنەدى. بۇگىن استانادا ورتالىق ازيا تاقىرىبىندا ءوتىپ جاتقان وتىرىس ارى قاراي قاي باعىتتا دامۋدىڭ مۇمكىندىكتەرىن جەتە تۇسىنۋگە ىقپال ەتەدى. بيىل وزبەكستاننىڭ قازاقستانداعى جىلى دەپ بەلگىلەنگەن. بۇل ءوز كەزەگىندە ەكى ەلدىڭ جاقىنداسا تۇسۋىنە مۇمكىندىك بەرەدى»، - دەدى م. بەكمۇرادوۆ.

وسى ورايدا ول الداعى جىلى وزبەكستانداعى قازاقستان جىلى باستالاتىنىن ەسكە سالدى.

ەستەرىڭىزگە سالا كەتەيىك، 2018 -جىل قازاقستانداعى وزبەكستان جىلى رەتىندە بەلگىلەندى.