بىشكەكتە قازاق-قىرعىز جاستار فورۋمى ءوتىپ جاتىر

بىشكەك. قازاقپارات - قازاقستان مەن قىرعىزستاننىڭ بەلسەندى جاستارى بىشكەكتە وتكەن قىرعىزستان-قازاقستان جاستار فورۋمىندا بىرلەسكەن باستامالاردى كوتەردى، دەپ حابارلايدى قازاقپاراتتىڭ مەنشىكتى ءتىلشىسى.

استانا ديپلوماتيالىق كلۋبى مەن قىرعىز رەسپۋبليكاسى ۇكىمەتى جانىنداعى جاستار ىستەرى، دەنەشىنىقتىرۋ جانە سپورت جونىندەگى مەملەكەتتىك اگەنتى ۇيىمداستىرعان فورۋمعا ەكى ەلدەگى جاستار ۇيىمدارىنىڭ 100 گە جۋىق وكىلى قاتىستى.

استانا ديپلوماتيالىق كلۋبىنىڭ پرەزيدەنتى قايىربولات ساحمەتوۆتىڭ ايتۋىنشا، كەزدەسۋدى وتكىزۋدەگى ماقسات - قازاقستان مەن قىرعىزستاننىڭ جاستار قوعامدىق ۇيىمدارىنىڭ وكىلدەرى جانە ستۋدەنتتەرى اراسىندا ىنتىماقتاستىقتى دامىتۋ، ەكىجاقتى جوبالار مەن باعدارلامالاردى ىسكە اسىرۋعا جاعداي جاساۋ، مادەنيەتارالىق ديالوگتى دامىتۋدى قولداۋ.

كەزدەسۋدە «ورتالىق ازيا سيفرلىق كلۋبى» جانە «ورتالىق ازيا ديپلوماتيالىق مەكتەبى» اتتى جاڭا جوبالار ماقۇلداندى. كەزدەسۋ قاتىسۋشىلارى ءبىراۋىزدان «ءبىر وزەن - ءبىر تاعدىر» («ورتاق وزەن - ورتاق تاعدىر») بىرلەسكەن ەكولوگيالىق اكسياسىن وتكىزۋ قاجەتتىگىن ايتتى.

بۇدان تىس، قازاقستاندىق قاتىسۋشىلار پرەزيدەنت نۇرسۇلتان نازاربايەۆتىڭ 5- قازانداعى جولداۋىندا ايتىلعان 2019-جىلدى جاستار جىلى دەپ جاريالاۋ تۋرالى باستاماعا توقتالدى. وسىعان بايلانىستى، بۇگىنگى فورۋم قاتىسۋشىلارى وسىنداي فورماتتاعى كەلەسى كەزدەسۋدى استانادا وتكىزۋدى ۇسىندى.