نۇرسۇلتان نازاربايەۆ يندونەزيا پرەزيدەنتىنە كوڭىل ايتۋ جەدەلحاتىن جولدادى

استانا. قازاقپارات - نۇرسۇلتان نازاربايەۆ يندونەزيا رەسپۋبليكاسىنىڭ پرەزيدەنتى دجوكو ۆيدودوعا كوڭىل ايتۋ جەدەلحاتىن جولدادى، دەپ حابارلايدى اقوردا.

مەملەكەت باسشىسى «Lion Air» اۋە كومپانياسىنىڭ جولاۋشىلار ۇشاعىنىڭ اپاتقا ۇشىراۋى سالدارىنان كوپتەگەن ادامنىڭ قازا بولعانى تۋرالى حاباردى زور كۇيزەلىسپەن قابىلدادى.

«قازاقستان حالقىنىڭ جانە جەكە ءوزىمنىڭ اتىمنان قازا بولعانداردىڭ تۋعان-تۋىسقاندارى مەن جاقىندارىنا، سونداي-اق بارشا يندونەزيا حالقىنا كوڭىل ايتىپ، قايعىلارىنا ورتاقتاستىعىمدى بىلدىرەمىن»، - دەلىنگەن جەدەلحاتتا.

ەسكە سالا كەتسەك، يندونەزيانىڭ Lion Air اۋە كومپانياسىنىڭ جولاۋشىلار ۇشاعى بۇگىن تاڭەرتەڭ اپاتقا ۇشىراعان بولاتىن. Jakarta Post اقپاراتى بويىنشا، ۇشاق جەرگىلىكتى ۋاقىتپەن تاڭعى ساعات 6:20 دا اۋەگە كوتەرىلگەن. 13 مينۋت وتكەننەن كەيىن ۇشاق راداردان جوعالىپ، ونىمەن بايلانىس ۇزىلگەن.

يندونەزيا قۇتقارۋ قىزمەتىنىڭ اقپاراتى بويىنشا، دجاكارتادان پانكالپينانگقا ۇشىپ بارا جاتقان Boeing 737 MAX 8 ۇشاعى تەڭىزگە قۇلاعان.