قازاقستاندىق بويجەتكەن بۋداپەشتتە شاشتاراز ونەرى بويىنشا مەدالونعا يە بولدى
بۋداپەشتتەگى شاراعا 29 ەلدىڭ جاستار قاتىستى. قازاقستان نامىسىن 25 قاتىسۋشى قورعادى. ولار ەلىمىزدىڭ بايقاۋىندا جەڭىمپاز اتانعان بولاتىن. سونىمەن قاتار 23 قازاقستاندىق ساراپشى قازىلار قۇرامىندا بولدى.
37 ماماندىق بويىنشا وتكەن بىرىنشىلىك ءتۇرلى سالالاردى قامتىدى. ولاردىڭ قاتارىندا قۇرىلىس، ءوندىرىس جانە ماشينا قۇراستىرۋ تەحنولوگياسى، كولىك جانە لوگيستيكا، روبوتتىق تەحنيكا، اسپاز ءىسى، فلوريستيكا، ينجەنەرلىك گرافيكا جانە باسقا دا كوپتەگەن باعىتتار بولدى.
ءبىزدىڭ جاستار 23 سالا بويىنشا باق سىنادى.
ولار: جۇك تەحنيكاسىنا قىزمەت كورسەتۋ، دانەكەرلەۋ تەحنولوگياسى، سانتەحنيكا جانە جىلىتۋ، توڭازىتقىش جانە جەلدەتۋ تەحنيكاسى، مەيرامحانا سەرۆيسى، جەڭىل كولىكتى جوندەۋ جانە قىزمەت كورسەتۋ، ماليار جانە دەكوراتيۆ جۇمىستارى، فلوريستيكا، مەحاترونيكا، ۆيزۋالدىق مەرچەندايزينگ جانە ۆيترينيستيكا، كىرپىش قالاۋ، قۇرىلىستىڭ سىلاق جۇمىستارى، گرافيكالىق ديزاين، اسپاز ءىسى، ناۋبايحانا شەبەرلىگى، ەلەكتر مونتاجداۋ جۇمىستارى، زەرتحانالىق حيميالىق اناليز، ينجەنەرلىك گرافيكا، شاشتاراز ونەرى، كيىم ديزاينى جانە مودەلدەۋ، ۆەب- ديزاين.
وسىلاردىڭ ىشىندە نازيرا ءابدۋحاليلوۆا «شاشتاراز ونەرى» بويىنشا ەرەكشە كوزگە ءتۇستى. تالانتتى بويجەتكەن «ايرىقشا مەدالون» يەلەندى جانە جيناعان ۇپاي سانى بويىنشا 22 ەلدىڭ ىشىندە 4-ورىن الدى.
EuroSkills شاراسى جىل سايىن WorldSkills Europe قاۋىمداستىعىنا مۇشە 29 ەلدىڭ بىرىندە ۇيىمداستىرىلادى. قازاقستان WorldSkills قاۋىمداستىعىنا 2014 -جىلى كىردى، ال 2016 -جىلى EuroSkills قاتارىنا قابىلداندى.
ەلىمىزدە WorldSkills Kazakhstan بيىل ءتورتىنشى مارتە وتكىزىلدى. ءىس- شارانى ق ر ءبىلىم جانە عىلىم مينيسترلىگى «كاسىپقور» حولدينگىمەن بىرلەسىپ ۇيىمداستىردى.
ەسكە سالا كەتسەك، بىلتىر قازاقستاندىق جاس شەبەرلەر ءابۋ-دابيدە وتكەن الەم بىرىنشىلىگىنە قاتىسقان بولاتىن.
ايتا كەتەرلىگى، EuroSkills اياقتالۋىنا وراي وتكىزىلگەن سالتاناتتى راسىمدە بايقاۋدىڭ جالاۋى اۋسترياعا تابىس ەتىلدى. ول مەملەكەت كەلەسى جىلى ەۋروپا بىرىنشىلىگىن ۇيىمداستىرادى.