قازاقستاندىق بارلاۋشىلار ۇلى بريتانياداعى سايىستا جۇلدە الدى
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتى حابارلادى.
بەلدى سايىسقا بارلىعى 37 ەلدەن 137 كوماندا قاتىستى. ونىڭ 90 ى ۇلى بريتانيا وكىلدەرى. بايقاۋدىڭ ءوزى قازاننىڭ 12 ى مەن 21 ى ارالىعىندا ۋەلس تاۋىنىڭ چەرنىح اۋدانىندا برەكون قالاشىعىنىڭ ماڭىندا سەننيبريدج پوليگونىندا ءوتتى.
بيىلعى جىلى سايىس جەردى بارلاۋ، ادامدار توبىنا العاشقى كومەك كورسەتۋ، سۋ بوگەتىن ەڭسەرۋ، زاقىمدالعان جەر ۋچاسكەسىندەگى ءىس-قيمىلدار، ەلدى مەكەندەگى تەكسەرۋ ءىس- قيمىلدارى، ارتيللەريانىڭ اتىسىن رەتتەۋ، شابۋىلداۋ ءىس- قيمىلدارىن جۇرگىزۋ سياقتى نەگىزگى تاپسىرمالاردان ۇيىمداستىرىلدى.
قازاقستاندىق بارلاۋشىلار توبىنىڭ كومانديرى كاپيتان رۋسلان ءشارىپوۆتىڭ ايتۋىنشا، مارشرۋتتىڭ جالپى ۇزىندىعى 60-تان اسا شاقىرىمدى قۇرادى.
«بىزگە قاشىقتىقتى 48 ساعات ىشىندە ەڭسەرۋگە تۋرا كەلدى. بۇل رەتتە جول- جونەكەي تاكتيكالىق تاپسىرمالاردى ورىندادىق. تاپسىرما بارعان سايىن كۇردەلەنە ءتۇستى. ونىڭ ۇستىنە ۇنەمى جاڭبىر جاۋىپ تۇردى. الايدا، بۇل جاعداي ءبىزدى قامشىلاي ءتۇستى جانە ءبىزدى جاقسى ناتيجەلەر كورسەتۋگە ىقپال ەتتى دەۋگە بولادى»، - دەدى رۋسلان ءشارىپوۆ.
ونىڭ سوزىنشە، سايىس بارىسىندا قاتىسۋشىلارعا تەك اعىلشىن تىلىندە سويلەسۋگە رۇقسات ەتىلدى، وزگە تىلدەرگە اۋدارۋ جوق. ءبىراق، ءۇشىنشى ناتيجە كورسەتكەن اسكەري قىزمەتشىلەرىمىز ءۇشىن ءتىل ماسەلەسى كەدەرگى بولعان جوق.
«Cambrian Patrol» حالىقارالىق وقۋ- جاتتىعۋى ۋەلستا جىل سايىن 40 جىل بويى وتكىزىلىپ كەلەدى جانە ارنايى ماقساتتاعى بولىمشەگە ىرىكتەۋمەن سالىستىرۋعا بولاتىن اسكەري قىزمەتشىلەر اراسىنداعى ەڭ كۇردەلى ءارى بەلدى سايىستىڭ ءبىرى بولىپ سانالادى. بۇل قاشىقتىقتى شامالى ادامدار عانا ەڭسەرە الادى.