قازاقستان ب ۇ ۇ قاۋىپسىزدىك كەڭەسىندە ميانمادا جاسالعان قىلمىستى ايىپتادى
بۇل تۋرالى قازاقپارات س ءى م باسپا ءسوز قىزمەتىنە سىلتەمە جاساپ حابارلايدى.
ب ۇ ۇ قاۋىپسىزدىك كەڭەسىنىڭ وتىرىسىندا ميانماداعى فاكتىلەردى انىقتاۋ بويىنشا تاۋەلسىز حالىقارالىق ميسسياسىنىڭ باسشىسى مارزۋكي دارۋسمان ءسوز سويلەپ، ميانماداعى جاعداي تۋرالى جانە روحيندجا حالقىنا قارسى ادام قۇقىقتارىنىڭ بۇزۋلۋى جالعاسىپ وتىرعانىن ايتىپ بەردى.
قازاقستان حالىقارالىق ميسسيانىڭ تەرگەۋ ناتيجەلەرى بويىنشا ەرەكشە الاڭداۋشىلىق ءبىلدىرىپ، راكحاين شتاتىندا جاسالعان قىلمىستى ايىپتادى.
«ميانماداعى روحيندجا-مۇسىلماندارىنا قاتىستى ەتنيكالىق جانە ءدىني كەمسىتۋشىلىك، وسى كۇنگە دەيىن جالعاسىپ وتىرعان كەڭ اۋقىمدى دەپورتاتسيالاۋ جانە قۋدالاۋدى قوسا العاندا ادام قۇقىقتارىنىڭ ايقىن، جاپپاي جانە جۇيەلى تۇردە بۇزىلۋى تۋرالى باياندامالار جان تۇرشىكتىرەدى»، - دەپ قازاقستاننىڭ ب ۇ ۇ جانىنداعى تۇراقتى وكىلىنىڭ ورىنباسارى قانات تۇمىش مالىمدەدى.
قازاقستاننىڭ وكىلى جاسالعان قىلمىستاردىڭ تولىق اشىلۋى جانە كىنالى ادامداردى جاۋاپكەرشىلىككە تارتۋ روحيندجا-مۇسىلماندارىنىڭ ءوز ۇيلەرىنە قايتۋدىڭ العىشارتتارىنىڭ ءبىرى بولاتىنىن اتاپ ءوتتى.
ءبىر ميلليون روحيندجا ادامدارى، ولاردىڭ كوپشىلىگى ايەلدەر مەن بالالار، ءالى كۇنگە بانگلادەشتەگى بوسقىندار لاگەرىندە تىم قيىن جاعدايعا تۇسۋگە ءماجبۇر بولىپ وتىر.
«ميانما ۇكىمەتى قاۋىپسىزدىك كەپىلدىگىن قامتاماسىز ەتۋگە، ءبىلىم الۋعا، جۇمىسقا ورنالاسۋعا، دەنساۋلىق ساقتاۋعا جانە تۇراقتى ۇزاق مەرزىمدى ءومىر سۇرۋگە مۇمكىندىك بەرمەي، قاجەتتى جاعدايلار جاساۋ پروتسەسىن جەدەلدەتپەگەنشە، روحيندجا-مۇسىلماندارىنىڭ راكحاين شتاتىنا قايتۋى مۇمكىن ەمەس»، - دەپ اتاپ ءوتتى قازاقستاننىڭ وكىلى.
قازاقستان بانگلادەش ۇكىمەتىنىڭ بوسقىندارعا كومەك كورسەتۋ جونىندەگى كۇش-جىگەرىن، ونىڭ ىشىندە ولاردى تۇرعىن ۇيمەن، ءدارى-دارمەكتەرمەن، ازىق-تۇلىك ونىمدەرىمەن قامتاماسىز ەتۋىن جوعارى باعالاپ، ب ۇ ۇ- عا مۇشە مەملەكەتتەردى، حالىقارالىق ۇيىمداردى وسى ەلگە جانە روحيندجا بوسقىندارىنا قاجەتتى قولداۋ كورسەتۋدى جالعاستىرا بەرۋگە شاقىردى.
ۇستىمىزدەگى جىلدىڭ ءساۋىر ايىندا قازاقستان ۇكىمەتى بانگلادەشتەگى كوكس-بازار قالاسىنىڭ ماڭىنداعى اۋماعىندا ورنالاسقان روحيندجا بوسقىندارىنا 500 مىڭ دوللار كولەمىندە گۋمانيتارلىق كومەك كورسەتىپ، ونى ولار تۇراتىن جەرلەرگە جەتكىزدى.