سۋىق تيۋدەن ەمدەلۋ: شىن مانىندە كومەكتەسەتىن ءارى قولجەتىمدى ادىستەر
سۋىق ءتيۋ - دياگنوز ەمەس. بۇل كوبىنە قىس پەن كۇز مەزگىلدەرىندە، كۇننىڭ سۋىعىندا پايدا بولاتىن اۋرۋلاردىڭ تۇرمىستىق دەڭگەيدە تاراعان ۇيرەنشىكتى اتاۋى.
سۋىق تيگەنىن مۇرىننىڭ بىتەلۋىنەن، تاماقتىڭ اۋىرعانىنان، جوتەلدەن، باس اۋرۋى مەن السىزدىكتەن بىلەمىز. كەيدە دەنە قىزۋى دا كوتەرىلەدى.
سۋىق ءتيۋ قايدان پايدا بولادى
سۋىق ءتيدى دەپ ايتىلاتىن اۋرۋ سۋىقتىڭ سەبەبىنەن پايدا بولمايدى. ادەتتە سۋىق ءتيۋ - بۇل مەديتسينالىق كارتالاردا ج ر ۆ ي اببريەۆياتۋرسىمەن بەلگىلەنەتىن ۆيرۋستىق ينفەكسيا.
اينالامىزدا ۇقساس اۋرۋ بەلگىلەرىن تۋدىراتىن ۆيرۋستاردىڭ سانى وتە كوپ. ۆيرۋستار كوپشىلىك جينالاتىن ورىنداردا (كولىكتە، كەڭسەلەردە، مەكتەپتە) اۋا نەمەسە قول ارقىلى تارالادى. اعزاعا ميكروبتار ەنگەن كەزدە، يممۋنيتەتىمىز شابۋىلعا جاۋاپ رەتىندە انتيدەنەلەر - ۆيرۋستى ولتىرەتىن قورعاۋشى اقۋىزدار وندىرەدى. بۇعان بىرنەشە (3-10) كۇن كەتەدى، ال سودان سوڭ يممۋنيتەت ميكروبتى جويادى.
ۆيرۋستار جىلدىڭ سۋىق مەزگىلىندە تارالادى جانە ناقتى نە ءۇشىن سولاي بولاتىندىعى بەلگىسىز. تومەن تەمپەراتۋرالاردا يممۋنيتەتىمىز السىرەپ، ونىڭ ۆيرۋستار شابۋىلىنا تويتارىس بەرۋ قابىلەتى ناشارلايدى دەگەن تەوريا بار. بۇل دەگەنىمىز، سۋىق تيۋگە كيىلمەگەن باس كيىم ەمەس، اعزانىڭ ميكروبتارمەن كۇرەسكە دايىن ەمەستىگى سەبەپ بولادى.
ايتا كەتەتىن جايت، تۇماۋ دا ج ر ۆ ي- گە جاتادى، ءبىراق ول الدەقايدا كۇردەلى ءارى قاۋىپتى ۆيرۋس بولىپ تابىلادى.
سۋىق تيۋدەن قالاي ەمدەلەدى
نەگىزىندە سۋىق تيۋ شامامەن ءبىر اپتا ىشىندە، انتيدەنەلەر پايدا بولۋ بارىسىندا وزىنەن-ءوزى قايتادى. ءبىراق ءبىز اۋرۋدى جەڭىلدەتە الامىز.
ۇيدە قالىپ، دەمالىڭىز
ارينە، جۇمىس باستان اسىپ جاتقان كەزدە، بولماشى عانا اۋرۋعا بولا ەركىنسىنىپ، ءوز- وزىمىزگە دەمالىس جاريالاي المايمىز. الايدا، اعزا دا ۆيرۋستارمەن كۇرەسىپ، ماڭىزدى ءارى كۇردەلى ءىس اتقارۋدا.
ءوزىن ناشار سەزىنگەن ادام ءۇشىن ناعىز كەرەگى - جاتىپ دەمالۋ.
سونىمەن قاتار، رەسپيراتورلى ۆيرۋستار (تىنىس الۋ جۇيەسىن زاقىمدايتىن تۇرلەرى) وتە جۇقپالى. ءتىپتى اۋىرعاننىڭ وزىندە جۇمىسقا نە ساباققا بارۋعا كۇشىڭىز جەتىپ تۇرسا دا، ۆيرۋستىڭ اعزاسى السىرەگەن ادامعا جۇعىپ كەتۋى مۇمكىن ەكەنىن ۇمىتپاڭىز. ءارى سول ادامعا اۋرۋمەن كۇرەسۋ وڭاي بولمايدى.
كوبىرەك سۇيىقتىق ءىشىڭىز
بۇل «كۇنىنە سەگىز ستاقان سۋ ءىشۋ قاجەت» دەيتىندەي كەڭەس ەمەس. سۋىق تيگەن كەزدە ادامعا شىن مانىندە سۇيىقتىق قاجەت. كەپتىرىلگەن جەمىستەن جاسالعان كومپوت نەمەسە جىلى شاي اۋرۋدىڭ بەلگىلەرىمەن كۇرەسۋگە كومەكتەسەدى. كۇنىنە ساۋ كەزىڭىزدە ىشەتىن مولشەردەن 3-5 شىنىعا ارتىق ىشكەن ءجون.
اعزادا سۇيىقتىق جەتكىلىكتى بولعان جاعدايدا ۆيرۋستار كەسىرىنەن ەڭ كوپ زارداپ شەگەتىن بارلىق شىرىشتىلاردىڭ جۇمىس ىستەۋى جەڭىلىرەك بولادى. ادام اۋىرعان كەزىندە كوپ سۇيىقتىق ىشسە، وكپەدەگى قاقىرىق پەن مۇرىنداعى شىرىش جەڭىل شىعادى، ياعني ۆيرۋستىق بولشەكتەر دەنەدە ۇزاق بوگەلمەيدى.
قاتتى قىزۋ كوتەرىلگەن كەزدە دەنە كوپ ىلعال جوعالتادى، سوندىقتان جوعارى تەمپەراتۋرا دا ءبىر شىنى شاي ىشۋگە سەبەپ بولادى.
شايعا شوپتەر (تۇيمەداق، جوكە، سالبەن) قايناتپاسىن قوسۋعا بولادى. ولار سۋىق تيۋ بەلگىلەرىن جەڭىلدەتۋگە مۇمكىندىك بەرەدى، ءارى شاي ءمازىرىن از دا بولسا تۇرلەندىرە تۇسەدى.
مۇرىنعا تامىزاتىن دارىلەر قولدانىڭىز
مۇرىن اۋرۋلارى ءار ءتۇرلى بولعاندىقتان، مۇرىنعا تامىزاتىن دارىلەردىڭ دە ءتۇر- ءتۇرى كەزدەسەدى.
1. تامىزاتىن دارىلەردىڭ تۇزدى سۋ قوسىلعان ءتۇرى. %0,9- دىق تۇز ەرىتىندىسى - شىرىشتى ىلعالداندىراتىن جاقسى ءدارى. ول مۇرىندى بارىنشا جۇمساق جولمەن جۋىپ- شايۋعا ءارى ىشىنەن شىرىشىن شىعارۋعا كومەكتەسەدى. كەيبىر وندىرۋشىلەر تەڭىز سۋىن ۇسىنادى، ءبىراق نەگىزى ءدارىحانادا ساتىلاتىن كادىمگى فيزەرىتىندىسىن (%0,9 ناتريي حلوريدى ەرىتىندىسىن) قولدانۋعا دا بولادى: ونىڭ باعاسى ارزانىراق. تۇزدى سۋدى ۇيدە جاساۋعا دا بولادى. ول ءۇشىن ءبىر شاي قاسىق تۇزدى ءبىر ليتر سۋدا ەرىتۋ قاجەت. مۇنداي سۋدى ءجيى تامىزىپ تۇرۋعا بولادى، ءار جارتى ساعات سايىن. سوندا ءسىز قاراپايىم ەمدىك زاتتىڭ بار كۇشىن شىن مانىندە سەزىنە الاسىز.
2. مايلى تامىزاتىن دارىلەر. مۇرىن بىتەلمەگەن جاعدايدا كومەكتەسەدى. ولار شىرىشتى قابىقتى ىلعالداندىرىپ، تىنىس الۋدى جەڭىلدەتەدى.
3. تامىر تارىلتقىش تامىزاتىن دارىلەر. ولار مۇرىنداعى تىنىس الۋدى قيىنداتاتىن ىسىكتى كەتىرەدى. مۇنداي دارىلەردى پايدالانعاندا اباي بولعان ءجون: داعدىلانىپ كەتپەۋ ءۇشىن ولاردى بەس كۇننەن ارتىق قولدانباۋ كەرەك، اسەر ەتۋشى زاتپەن ۋلانۋدى بولدىرماۋ ءۇشىن ينسترۋكسيادا كورسەتىلگەن مولشەردەن اسىرماۋ قاجەت (اسىرەسە بۇل بالالار ءۇشىن ماڭىزدى).
اۋىرعان تاماققا كومەكتەسىڭىز
اۋىرعان تاماققا جۇمساق تەراپيا جاقسى كومەكتەسەدى: جىلى شايدى از- ازدان ۇرتتاپ ءىشۋ، جىلى سۇيىقتىقپەن شايقاۋ، سوراتىن دارىلەر پايدالانۋ.
تاماقتى شايقاعاندا دا وزىڭىزگە ۇنايتىنىن تاڭداعان ءجون. مىسالى، اتالعان شوپتەر (تۇيمەداق نەمەسە قىرمىزىگۇل) قايناتپاسىمەن شايقاۋعا بولادى.
ءوزىڭىزدى يودتان، سودادان نەمەسە كەروسين نەگىزىندەگى الوەدان ەليكسير جاساۋعا ماجبۇرلەمەڭىز.
شايقاۋداعى ماقسات - بارلىق ءتىرى ورگانيزمدى جويۋ ەمەس، اۋرۋ مەن جۇتۋدى جەڭىلدەتۋ. ءبارىبىر ۆيرۋستى مۇنداي ادىسپەن جۋىپ كەتىرە المايسىز.
اۋىرسىنۋدى باساتىن ءدارى قولدانىڭىز
باس قاتتى اۋىرىپ، سىنىپ بارا جاتسا، ءوز-ءوزىڭىزدى قيناماي، يبۋپروفەن نەمەسە پاراتسەتامول نەگىزىندەگى دارىلەردى ءىشىڭىز.
تەمپەراتۋرانىڭ جۇمىس ىستەۋىنە مۇمكىندىك بەرىڭىز
دەنە قىزۋى °C38,5-تان جوعارى بولعاندا عانا ونى ءتۇسىرۋ ءۇشىن ارەكەت ەتىڭىز. بۇل شاماعا دەيىن تەمپەراتۋرامەن كۇرەسپەگەن ءجون، ويتكەنى ول ۆيرۋستاردى جويۋ ءۇشىن قاجەت. ارينە، ەگەر ءسىز ءوزىڭىزدى ناشار سەزىنسەڭىز، اۋرۋدى جانە قىزۋدى باساتىن ءدارى- دارمەك ىشكەنىڭىز ابزال.
بولمەنى جەلدەتىپ تۇرىڭىز جانە سەرۋەنگە شىعىڭىز
تەرەزەنىڭ جەلدەتكىشىنەن كىرگەن تازا اۋا مەن وتپە جەل جاعدايىڭىزدى ناشارلاتپايدى. كەرىسىنشە، ولاردىڭ كومەگى تيەدى. جەلدەتۋ - بۇل بولمەدەگى اۋانى ميكروبتاردان تازارتۋ جولى، دەزينفەكسيالاۋدىڭ ەڭ قاراپايىم ءارى قولجەتىمدى ءادىسى.
تازا اۋادا جايمەن سەرۋەندەۋ ءوزىڭىزدى جاقسىراق سەزىنۋگە كومەكتەسەدى، الايدا سەرۋەننىڭ ساۋدا ورتالىعىندا ەمەس، ساياباقتا نەمەسە ادام كوپ جۇرمەيتىن اللەيادا بولعانى دۇرىس.
ارينە، ءوزىڭىزدى ازدى- كوپتى جايلى سەزىنگەنىڭىزدە نەمەسە جازىلا باستاعانىڭىزدا عانا سەرۋەندەۋدىڭ پايداسى تيەر.
سۋىق تيگەندە قانداي ەم-شارا قولدانباۋ كەرەك
دەمەك، سۋىق تيگەندە اۋرۋ وزىمەن ءوزى قايتادى جانە ونى ەمدەۋدىڭ قاجەتى جوق. ءبىراق، مۇنى قابىلداۋ قيىن، تەزىرەك قانداي دا ءبىر شارا قولدانىپ، اعزاعا قالاي دا اسەر ەتكىڭ كەلەدى - قول قۋسىرىپ وتىرا المايسىڭ عوي؟ الايدا، ناعىز كەرەگى دە سول. سۋىق ءتيۋ اۋرۋلارى ءۇشىن كۇتىم مەن رەجيمنىڭ ءوزى ەم بولىپ تابىلادى، ولاردىڭ ماڭىزدىلىعىن دا جەتە باعالاماۋعا بولماس.
ءدارى قوراپشاسىن كوزدەگەنىڭىزدە نە ىستەمەۋ كەرەكتىگىن ەسىڭىزدە ساقتاڭىز:
1. انتيبيوتيك ءىشۋ. انتيبيوتيكتەر تەك باكتەريالارعا اسەر ەتەدى جانە ۆيرۋستاردى ولتىرمەيدى. باكتەرياعا قارسى دارىلەردى كورسەتكىشتەرگە نەگىزدەلمەي ءىشۋ قاۋىپتى: نەبىر جاناما قۇبىلىستاردى جيىپ الىپ، ەمگە دە كونبەيتىن سۋپەرباكتەريانى ءوسىرىپ الۋىڭىز مۇمكىن.
2. ءدارىحانادان ۆيرۋسقا قارسى دارىلەردى جانە يممۋنومودۋلياتورلاردى ساتىپ الۋ. ولاردىڭ تيىمدىلىگى دالەلدەنبەگەن، تەك ءاميانىڭىزدى بوساتۋ جاعىنان العاندا ءوز جۇمىسىن 0-عا اتقاراتىنى ءسوزسىز. بۇل ايتىلعاندار گومەوپاتياعا دا قاتىستى.
3. قىشا قاعاز سالۋ جانە اياقتى بۋلاۋ. اجەلەر مەن اتا-انالار سونداي جاقسى كورەتىن بۇل ادىستەر اسا قاۋىپتى: ىستىق سۋدان نەمەسە قىشادان كۇيىپ قالۋ قاتەرى زور. مۇنداي شارالار ۆيرۋستاردى ولتىرمەيدى. مەديتسينالىق كوللەدجدەردە بۇل پروتسەدۋرالار پاسيەنت وزىنە دەگەن قامقورلىقتى سەزىنىپ، اۋرۋ جايىندا مەيلىنشە از ويلاۋى ءۇشىن، ياعني ونىڭ كوڭىلىن اۋلاۋ ماقساتىندا قولدانىلاتىن ەم- شارا رەتىندە وقىتىلادى ەكەن.
4. كوپ دارۋمەن ءىشۋ. اسىرەسە س دارۋمەنىن. كەزىندە سۋىق ءتيىپ اۋىرعاندا ونىڭ كومەگى تيەدى دەپ ويلاعان. شىندىعىندا ولاي ەمەس، ءبىراق ەسكى سەنىمدەر ۇزاق جاسايدى.
سۋىق ءتيۋ نەمەن قاۋىپتى
جالپى دەنساۋلىعى ءبىرقالىپتى ادام ءۇشىن سۋىق تيۋ قاۋىپتى ەمەس. ءبىراق، ەگەر ءوز-ءوزىڭدى قيناپ، اعزانىڭ ساۋىعۋىنا جول بەرمەسەڭ، اۋرۋ اسقىنىپ كەتۋى مۇمكىن. مىسالى، ۆيرۋستىق ينفەكسياعا باكتەريالدىق ينفەكسيا قوسىلادى، ال ول ۇزاق ەمدەلەدى، نەمەسە سۋىق تيۋ وكپەنىڭ قابىنۋىنا ۇلاسىپ كەتەدى. سونىمەن بىرگە، ينفەكسيا سوزىلمالى بولىپ كەتۋى مۇمكىن، ياعني ول ۇنەمى قايتالانىپ تۇراتىن بولادى.
سوندىقتان، كەز كەلگەن سۋىق ءتيۋ - ءوز-وزىڭە كوڭىل ءبولىپ، دەنساۋلىقتى قالپىنا كەلتىرۋ ءۇشىن ۋاقىت تابۋعا بىردەن-ءبىر سەبەپ.
قاي كەزدە كومەككە جۇگىنۋ قاجەت
سۋىق تيۋ تۇرىندە الدەقايدا اۋىر دەرت جاسىرىنۋى مۇمكىن. ەگەر تومەندەگىدەي جاعدايلار ورىن السا، مىندەتتى تۇردە مەديتسينالىق كومەككە جۇگىنىڭىز:
- اۋرۋ بەلگىلەرى ءۇش اپتا ىشىندە قايتپاسا.
- قانداي دا ءبىر اۋرۋدىڭ بەلگىسى كۇشەيىپ كەتسە نەمەسە اۋىرتا باستاسا.
- تىنىس الۋ قيىنداسا.
- كەۋدە تۇسى اۋىرا باستاسا.