تۇركىستاندا دايىندالعان تۇيە ءسۇتى قىتايعا ەكسپورتقا شىعارىلادى
جوبالىق قۇنى - 7.5 ميلليارد تەڭگە. كۇنىنە 100 تونا ءسۇت وندىرەتىن كاسىپورىندا قازىر ءجۇز ادام ەڭبەك ەتەدى. ونىڭ ونى قىتايلىق مامان بولسا، قالعانى - جەرگىلىكتى تۇرعىندار.
بۇل - ورتالىق ازيادا تەڭدەسى جوق، تۇيە سۇتىنەن قۇرعاق ۇنتاق شىعاراتىن جالعىز زاۋىت. تۇركىستان يندۋستريالدى ايماعىندا ورنالاسقان كاسىپورىننىڭ قۇرىلىسى وتكەن جىلدىڭ قاڭتار ايىندا باستالعان. بيىلعى جىلدىڭ ماۋسىم ايىندا سىرتقى قۇرىلىس جۇمىستارى مەن قۇرال- جابدىقتارىن مونتاجداۋ جۇمىستارى تولىق اياقتالدى. الىپ وڭدەۋ كەشەنى تولىقتاي سوڭعى ۇلگىدەگى زاماناۋي قۇرال- جابدىقتارمەن قامتىلعان. تۇيە شارۋاشىلىقتارىنان جينالعان ءسۇت الدىمەن وسى الدىن الا وڭدەۋ سەحىنا جەتكىزىلىپ، وسى جەردە تولىق وڭدەلەدى.
بيىل عانا وقۋ ءبىتىرىپ، جاڭا تەحنولوگيانىڭ ءتىلىن تەز مەڭگەرگەن ارشىن عابيدەن - قازىر وسى سەحتىڭ بەلدى جۇمىسشىسى.
ارشىن عابيدەن، الدىن الا وڭدەۋ سەحىنىڭ جۇمىسشىسى:
- بۇل سەح ەڭ سوڭعى جاڭا تەحنولوگيامەن جابدىقتالعان. بارلىق جۇيە اۆتوماتتاندىرىلعان. سيفرلى تەحنولوگيامەن باسقارىلادى. بۇل سەحتىڭ نەگىزگى مىندەتى، ءسۇتى قابىلداپ العاننان كەيىن ەڭ العاشقى وڭدەۋ پروتسەستەرى جۇرەدى. ارنايى قوندىرعىمەن تازالانىپ، زالالسىزداندىرىلادى. ەڭ سوڭىندا تازا ءسۇتتى كەلەسى سەحقا جىبەرىپ، ۇنتاق ەتىپ شىعارۋعا دايىندايمىز.
زاۋىت تاۋلىگىنە 100 توننا تۇيە جانە بيە ءسۇتىن وڭدەپ، ودان قۇرعاق ۇنتاق شىعارادى. مىسالى 15 توننا تۇيە سۇتىنەن 1 توننا دايىن ۇنتاق الىنادى. ماسەلەن، قۇتىداعى قۇرعاق ۇنتاقتى سۋعا ەزىپ، شۇبات رەتىندە پايدالانا بەرۋگە بولادى. ءبىر قۇتىنىڭ ىشىندەگى ۇنتاقتىڭ سالماعى - 330 گرام. ەگەر مۇنى تۇيە سۇتىنە اينالدىراتىن بولساق، 3,5 ليتر دايىن شۇباتقا اينالادى. زاۋىتتان شىققان دايىن ءونىم نەگىزىنەن قىتايعا ەكسپورتتالادى. «ودان كەيىن ەۋروپا ەلدەرى مەن ا ق ش- قا ەكسپورتتاۋ جوسپاردا بار»، - دەيدى زاۋىت ماماندارى.
ايتا كەتەيىك، كاسىپورىن - قازاقستان مەن قىتايدىڭ بىرلەسكەن جوباسى. قىتاي ينۆەستورلارىنىڭ قارجىسىنا سالىنعان زاۋىت قۇنى - 21 ميلليون دوللار، ياعني 7,5 ميلليارد تەڭگە. دايىن تاۋار تولىقتاي ەكسپورتقا شىعارىلاتىندىقتان، ءونىم ساپاسىنا قويىلار تالاپ تا جوعارى.
جازيرا وزات قىزى، زاۋىت ديرەكتورىنىڭ ءبىرىنشى ورىنباسارى:
- بىزدەگى قۇرال- جابدىقتار ەڭ جاڭا تەحنولوگيامەن جابدىقتالعان. بۇل جەردە ادامنىڭ قول كۇشى جۇمىس ىستەمەيدى. تەك قانا ماماندار قاداعالاپ، باقىلاپ، باسقارىپ وتىرادى. بۇگىنگى تاڭدا مونتاج جۇمىستارى اياقتالىپ، قازىر ىسكە قوسىلۋعا دايىن تۇر.
زاۋىت ديرەكتورىنىڭ ءبىرىنشى ورىنباسارى جازيرا وزات قىزىنىڭ ايتۋىنشا، قازىر مۇندا 100 ادام ەڭبەك ەتەدى. ونىڭ 10-ى قىتايلىق مامان بولسا، قالعان 90-نى - جەرگىلىكتى تۇرعىندار. ال زاۋىتقا قاجەتتى شيكىزات تۇركىستان وبلىسىنداعى تۇيە شارۋاشىلىقتارىنان جەتكىزىلەدى. شۇباتتىڭ ءبىر ليترىن شارۋالاردان 450 تەڭگەدەن ساتىپ الادى. بۇل ءبىر جاعىنان وڭىردەگى تۇيە شارۋاشىلىعىنىڭ دامۋىنا سەرپىن بەرسە، ەكىنشىدەن ۇلتتىق سۋسىنىمىز الەمدىك نارىققا شىعادى. بۇكىل ورتا ازيا كوز تىككەن زاۋىت قازىر سىناق مەرزىمىندە جۇمىس ىستەپ جاتىر. بۇيىرسا، بيىلعى جىلدىڭ سوڭىندا تولىق ىسكە قوسىلماق.
www.24.kz