مىسىردا بەيبارىس سۇلتان مەشىتىن قالپىنا كەلتىرۋ جۇمىستارى باستالدى

كاير. قازاقپارات - جوبانىڭ اشىلۋ سالتاناتىنا قازاقستاننىڭ مىسىرداعى ەلشىسى ارمان يساعاليەۆ، مىسىردىڭ كونە ەسكەرتكىشتەر ءمينيسترى حالەد ءال-اناني، جوبانىڭ باس مەردىگەرى «اراب كونتراكتورس» كومپانياسىنىڭ باسقارما ءتوراعاسى مۋحسين سالاح، پارلامەنت دەپۋتاتتارى، مەملەكەتتىك مەكەمەلەر باسشىلارى، جۋرناليستەر، تاريحشى عالىمدار، بەلسەندىلەر جانە جەرگىلىكتى حالىق قاتىستى.

بۇل تۋرالى ق ر س ءى م  باسپا ءسوز قىزمەتىنە سىلتەمە جاساپ قازاقپارات حابارلايدى.

مىسىردىڭ كونە ەسكەرتكىشتەر ءمينيسترى حالەد ءال-اناني كايردەگى ەكىنشى ەڭ ءىرى مەشىت بولىپ سانالاتىن بابامىزدىڭ مۇراسى - كاير ءۇشىن تاريحي ماڭىزدى نىسان ەكەنىن اتاپ ءوتتى.

«بۇل مەشىت - ساياسي تۇرعىدان قازاقستان مەن مىسىر اراسىنداعى قارىم-قاتىناستىڭ ءرامىزى. بەيبارىستىڭ كىندىك تامعان جەرى سانالاتىن قازاقستان باسشىلىعى مەن حالقى جوبانىڭ اياقتالۋىنا ۇلكەن ءمان بەرىپ وتىر. اتالعان ماسەلە - مىسىر پرەزيدەنتى ابدۋل-فاتتاح حاليل ءاس-ءسيسيدىڭ 2016-جىلى استاناعا ساپارى بارىسىندا قوس مەملەكەت باسشىلارى اراسىندا قول جەتكىزىلگەن ۋاعدالاستىقتاردىڭ ءبىرى»، - دەپ مالىمدەدى ح. ءال-اناني.

بۇعان دەيىن جوبانىڭ ارحەلوگيالىق جانە ساۋلەتتىك زەرتتەۋلەرى، سونداي-اق ىرگەتاس جانە جەراستى جۇمىستارى بىتكەنىن مالىمدەگەن مىسىرلىق مينيستر مەشىتتىڭ شاڭىراقتى بولمەلەرىن، ءدالىزىن، كۇمبەزىن، مۇنارالارىن، ورتالىق الاڭىن جانە سىرتقى قابىرعالارىن جوندەۋ جۇمىستارى ىسكە اسىرىلاتىنىن حابارلادى. جوباعا تەحنيكالىق باقىلاۋدى مىسىرلىق ارحەولوگتار مەن تاريحي ساۋلەتشىلەردەن قۇرىلعان ارنايى كوميسسيا جۇرگىزەدى. اتالعان كوميسسيا مەشىتتىڭ ىشكى باعانالارىنا بۇعان دەيىن پايدالانىلعان قىزىل كىرپىشتەردى جارامسىز دەپ تاۋىپ، ءوز ءتۇپ نۇسقاسىنا ۇقساس جوعارى ساپالى گرانيتتىك قىشتى پايدالانۋدى ءجون دەپ تاپتى.

ارمان يساعاليەۆ قازاقستان مەن مىسىر اراسىنداعى تاريحي بايلانىستاردىڭ رامىزىنە اينالعان قازاق دالاسىنىڭ پەرزەنتى سۇلتان بەيبارىستىڭ مۇراسىن جاڭعىرتۋ جۇمىستارىنىڭ قايتا باستالعانىن ريزاشىلىقپەن اتاپ ءوتىپ، مىسىردىڭ مەملەكەت جانە ۇكىمەت باسشىلىعىنا العىسىن ءبىلدىردى.

«ورتاق مۇرامىزدى ساقتاۋعا دەگەن مىسىر باسشىلىعىنىڭ قامقورلىعىن جوعارى باعالايمىز. مىسىردى مۇسىلمان الەمىنىڭ ورتالىعى، كايردى ابباسيد حاليفاتىنىڭ استاناسى ەتىپ كوتەرگەن كەمەڭگەر تۇلعانىڭ ەسكەرتكىشى قايتا قالپىنا كەلتىرىلىپ، مىسىردىڭ مۇسىلمان الەمىندەگى ەرەكشە رولىنە، تاياۋ شىعىستاعى بەدەلى مەن ابىرويىنا تاعى دا ءبىر ءرامىز بولادى دەگەن سەنىمدەمىن»، - دەدى قازاقستاندىق ديپلومات.

قۇنى 12 ميلليون ا ق ش دوللارىن قۇرايتىن مەشىتتى رەستاۆراتسيالاۋ جوباسىنا قازاقستان تاراپىنان 4,5 ميلليون ا ق ش دوللارى بولىنگەن. ال مىسىر تاراپى 100 ميلليون مىسىرلىق فۋنت اۋدارعان.

قالپىنا كەلتىرۋ جۇمىستارى 18 اي ىشىندە بىتەدى دەپ كۇتىلۋدە.