اتاقتى الماتى اپورتىنا ارناپ مۋزەي اشىلدى
كەلۋشىلەر «گورود يابلوچنىح سنوۆ» مۋلتيمەديالىق ەكسپوزيتسياسىنان ايگىلى الماتىلىق المالاردىڭ تاريحىن تاماشالاپ قانا قويماي، تىڭ دەرەكتەرمەن قانىقتى.
«بۇكىل قالالىقتار ەسكى الماتىنى اڭسايتىن سياقتى. ءبىز قالامىزعا ەجەلگى الما مادەنيەتىن قايتارعىمىز كەلەدى. قالاعا كەلۋشىلەر الما باقتارى مەن ولاردىڭ يىسىنە عاشىق بولاتىن. وسىنداي اسەرلەردى قايتادان سەزىنگىمىز كەلەدى. بۇل مۋزەي قالامىزعا قاجەت بىردەن- ءبىر ورىن» ، - دەدى Alma museum مۋزەيىنىڭ بىرلەسكەن ۇيىمداستىرۋشى ءارى ارحيتەكتورى جاننا سپۋنەر.
ارحيتەكتور جاننا سپۋنەر مەن «المالى جۇماق» قوعامدىق قورىنىڭ باسشىسى اجار جاندوسوۆا الماتىنىڭ المالارى ءۇشىن مۋزەي ۇيىمداستىرۋدى ەكى جىلدان بەرى جوسپارلاپ كەلگەن. ولار الماتىعا گۇلدەنگەن باقشالى قالا اتاعىن قايتارىپ بەرۋدى كوزدەپ وتىر.
مامانداردىڭ ايتۋىنشا، الماتىلىق اپورت نەگىزىنەن سيۆەرس الما اعاشىنىڭ جاي الما اعاشىمەن تەلىنۋىنەن پايدا بولعان.
«اپورتتىڭ «اكەسى» - ەگور رەدكو. ول 1865 -جىلى رەسەيدەن بىرنەشە الما كوشەتىن الىپ كەلگەن. الايدا ول سورتتاردىڭ ەشقانداي ەرەكشەلىگى بولماعان. اعاشتاردى سيۆەرس المالارىمەن تۇقىمداستىرعاننان كەيىن الما اعاشى ەرەكشە جەمىس بەرە باستادى. ول كىسى الما پاتشاسى دەسەك تە بولادى. ءبىز دە ونى پاتشامىز دەپ سانايمىز. ول وسىرگەن المالار وتە ۇلكەن ءارى حوش ءيىستى. ەندى بولاشاققا سەنىممەن قارايمىز. ەلىمىزدەگى الما كاسىبىن جانداندىرۋ ءۇشىن بۇل تاقىرىپتى كەڭىنەن قوزعايمىز. الما - ءبىزدىڭ ايرىقشا قۇندىلىعىمىز. ولاردى جوعالتۋعا ءبىزدىڭ ەشقانداي قۇقىعىمىز جوق» ، - دەدى ا. جاندوسوۆا.
«گورود يابلوچنىح سنوۆ» كورمەسى كەلەسى جىلدىڭ 20 - قاڭتارىنا دەيىن جالعاسادى. كورمەدەن سوڭ كەلۋشىلەر نازارىنا ايگىلى جەمىس تۋرالى قىزىقتى وقيعالار، اڭىزدار مەن ەرتەگىلەر ۇسىنىلادى.