قازاقستاندىق وقۋشىلار اراسىندا ءجيى كەزدەسەتىن اۋرۋلار اتالدى

 استانا. قازاقپارات - قازاقستاندا وقۋشىلاردىڭ كورۋ قابىلەتى تومەندەپ بارادى.

الماتى قالاسى قوعامدىق دەنساۋلىق ساقتاۋ دەپارتامەنتى جۇرگىزگەن ارنايى ساۋالنامانىڭ قورىتىندىسى وسىنداي، دەپ «حابار 24» تەلەارناسىنا سىلتەمە جاساپ bilim-all.kz حابارلايدى.

بۇگىنگى كۇنى بالالار قولى قالت ەتسە پلانشەت پەن گادجەتكە، ودان قالا بەردى تەلەديدارعا ۇڭىلەدى. جاڭا تەحنولوگيانىڭ جەتىستىكتەرى بۇگىنگى تاڭدا وقۋشىنىڭ ءارى قامقورشىسى، ءارى الدانىشى. دۇرىس قولدانا بىلسەڭ، كوپكورىم پايداسى بار. ال ۋاقىتتىڭ قادىرىن بىلمەي ۇزاق وتىرساڭ، زيانى دا بارشىلىق. بۇعان ستاتيستيكا دالەل.

«وقۋشىلار اراسىندا ءجيى كەزدەسەتىن اۋرۋلاردىڭ تۇرلەرىنە كەلەتىن بولساق، ءبىرىنشى ورىندا كورۋ قابىلەتىنىڭ ناشارلاۋى تۇر. سونداي-اق تىرەك-قيمىل جۇيەلەرى سىر بەرەدى. ونىڭ ىشىندە ارقا ومىرتقاسىنىڭ قيسايۋى كوپ كەزدەسەدى. ءۇشىنشى ورىندا جۇيكە جانە اسقازان- ىشەك جولىنىڭ اۋرۋلارى بار»، - دەيدى قالالىق قوعامدىق دەنساۋلىق ساقتاۋ دەپارتامەنتىنىڭ باسشىسى ايزات مولداقاسىموۆا.

سوڭعى ءۇش جىلدا مەملەكەت تاراپىنان مەكتەپتەگى مەديتسينا قىزمەتىنە ەرەكشە كوڭىل ءبولىنىپ كەلەدى. گۇلنار دىعايەۆا 18 جىلدان بەرى №52 -مەكتەپتە مەدبيكە بولىپ جۇمىس ىستەيدى. ونىڭ مىندەتىنە العاشقى مەديتسينالىق كومەك كورسەتۋمەن قاتار، ساۋىقتىرۋ، الدىن الۋ جۇمىستارى دا كىرەدى. پارتادا دۇرىس وتىرۋدان باستاپ دۇرىس تاماقتانۋدىڭ قىر- سىرىنا دەيىن ۇيرەتەدى.

تالاپ بويىنشا وسىنداي «سەرگىتۋ ءساتى» قالانىڭ بارلىق ءبىلىم وشاعىندا ءجۇرۋى ءتيىس. قاراپايىم عانا جاتتىعۋلاردىڭ وقۋشىلار ءۇشىن، اسىرەسە باستاۋىش سىنىپ بالالارى ءۇشىن پايداسى كوپ. سوڭعى جىلدارى كوز اۋرۋلارىنىڭ 1,5 ەسەگە ازايۋى سوعان دالەل.

«وقۋشىلارعا وتە قىزىقتى. بالالار وتە بەلسەندى تۇردە قاتىسىپ، قوسىلىپ وتىرادى. كوڭىلدى مۋزىكالاردى قوسىپ، بالالاردىڭ دەنە شىنىقتىرۋداعى جاساعان ءاربىر ءىس- قيمىلىن قوسا وتىرىپ، بي جانە دە جاتتىعۋ جۇمىستارىمەن سەرگىتۋ ءساتىن ورىنداتىپ وتىرامىز»، - دەيدى №52 -مەكتەپتىڭ مۇعالىمى ايجان ەركەبايەۆا.

الماتى قالاسى قوعامدىق دەنساۋلىق ساقتاۋ دەپارتامەنتى جۇرگىزگەن ساۋالناما تاعى ءبىر ماسەلەنى انىقتادى. قالاداعى 10 وقۋشىنىڭ بىرەۋى عانا سپورتپەن بەلسەندى اينالىسادى ەكەن. سونىمەن قاتار جەمىس-جيدەك پەن كوكونىستى مۇلدەم قولدانبايتىندار دا بار. سول سەبەپتى ماماندار اتا-انالارعا اس ءمازىرىن دۇرىستاپ، سالاماتتى ءومىر سالتىن ۇستانۋعا كەڭەس بەرۋدە.