شاش نەگە تۇسەدى؟

 استانا. قازاقپارات - الەمدەگى بارشا ادامنىڭ شاشى تۇسەدى، تەك بىرىندە از، ەندى بىرىندە كوپ مولشەردە ءتۇسىپ جاتادى.

سەبەبى، شاشتىڭ دا ءوز ءومىر ءسۇرۋ مەرزىمى بار، سوندىقتان شاشتىڭ از مولشەردە ءتۇسۋى - زاڭدى ۇدەرىس.

ادامنىڭ باسىنان كۇنىنە 100 تال شاشتىڭ ءتۇسىپ تۇرۋى قالىپتى جاعداي. شاشتىڭ ومىرلىك تسيكلى شارتتى تۇردە ءۇش كەزەڭگە بولىنەدى: بەلسەندى ءوسۋ كەزەڭى (اناگەن) ول - ەكى جىلدان التى جىلعا دەيىن؛ دەمالىس كەزەڭى (كاتاگەن) بار بولعانى 15-20 كۇنگە جانە جويىلۋ كەزەڭى (تەلوگەن)، 90-120 كۇنگە دەيىن جالعاسادى. الايدا، شاش قالىپتى مولشەردەن تىس تۇسەتىن كەزدەر بولادى. سونىمەن، شاشتىڭ ءتۇسۋىنىڭ سەبەبى نەدە؟

شاشتىڭ ءتۇسۋ سەبەپتەرى

شاش ءتۇسۋىنىڭ ەڭ قاراپايىم سەبەبى - ماۋسىمدىق وزگەرىستەردەن بولۋى مۇمكىن. كوكتەمدە جانە كۇز مەزگىلدەرىندە شاشتىڭ قارقىندى ءتۇسۋى - قالىپتى جاعداي بولىپ سانالادى. دۇرىس تاماقتانباۋ، اعزاعا اقۋىزدىڭ، دارۋمەندەر مەن ميكروەلەمەنتتەردىڭ، اسىرەسە، ماۋسىمارالىق كەزەڭدە مىرىش پەن تەمىردىڭ جەتىسپەۋى، نەمەسە ءار ءتۇرلى ديەتالاردىڭ اسەرى شاش ساۋلىعىنىڭ بۇزىلۋىنا بىردەن ءبىر سەبەپشى. وسى مەزگىلدە بولاتىن يممۋنيتەتتىڭ السىرەۋى دە شاشتىڭ تۇسۋىنە اكەپ سوعادى.

سوڭعى جىلدارى شاش ءتۇسۋىنىڭ نەگىزگى سەبەبتەرى: كۇيزەلىس، زياندى ادەتتەر، ۇيقىسىزدىق پەن دەپرەسسيا، قالجىراۋ - تەك شاشقا عانا ەمەس بۇكىل اعزاعا تەرىس اسەرىن تيگىزەدى.

كوپ جاعدايدا شاش باس تەرىسى اۋرۋلارىنىڭ سالدارىنان تۇسەدى. ءتىپتى شاشقا ەشقانداي قاتىسى جوق دەپ ويلايتىن اۋرۋلاردىڭ اسەرىنەن دە ءتۇسۋى مۇمكىن. مىسالى: قانت ديابەتى، پنيەۆمونيا، تەمىرتاپشىلىقتى انەميا، يممۋنيتەتتىڭ السىرەۋىنە اكەلەتىن ينفەكتسيالىق اۋرۋلار، جانە ت. ب. سونداي- اق شاشتىڭ مولشەردەن ارتىق ءتۇسۋى انتيبيوتيكتەردى، گورموندىق پرەپاراتتار مەن كەيبىر جۇكتىلىكتىڭ الدىن الاتىن دارىلەردى قابىلداۋدىڭ ناتيجەسى دە بولۋى مۇمكىن.

شاشقا سانالى تۇردە زيان جاسايتىنىمىز تاعى بار. ىستىق اۋامەن كەپتىرۋ، حيميالىق بۇيرالاۋ، شاشتى بوياۋ، شاش تۇزەتەتىن قۇرالدى، بيگۋديدى كوپ قولدانۋ، سونىمەن قاتار، شاشتى ءجيى جۋۋ، قارقىندى تاراۋ، شاش كۇتىمىنە ارنالعان قۇرالداردى دۇرىس تاڭداماۋ - شاشىڭىزعا ساۋلىق سىيلاماسى انىق. سونىمەن قاتار شاشتى تابيعي فاكتورلاردان: قىستا ايازدان، جازدا كۇننىڭ كوزىنەن، جىلدىڭ كەز- كەلگەن مەزگىلىندەگى جاۋىن- شاشىنىنان قورعاۋ اسا ماڭىزدى. سونداي- اق قاناينالىمدى بۇزاتىن تار باسكيىمنەن، جاساندى شاش (پاريكتەردەن) باس تارتۋ كەرەك.

ءبىراق، ءبىز ءىس جۇزىندە اسەر ەتە المايتىن فاكتورلار دا جوق ەمەس. مىسالى: تۇقىمقۋالاۋشىلىق نەمەسە اعزاداعى گورمونداردىڭ بۇزىلۋى اسەرىنەن شاشتىڭ ءتۇسۋى. بۇل جاعدايلاردا شاش كوپ مولشەردە ەمەس، ءتىپتى تولىعىمەن ءتۇسىپ قالۋى مۇمكىن. ادەتتە بۇعان ەر ادامدار بەيىم كەلەدى، سەبەبى شاشتىڭ تولىق ءتۇسۋى ەرلەردەگى جىنىس گارمونى - اندروگەندەردىڭ شەكتەن تىس كوبەيۋىنەن بولادى. دەگەنمەن بۇل جاعداي ايەلدەردە دە كەزدەسۋ مۇمكىن. سونداي- اق قالقانشا بەزى قىزمەتىنىڭ بۇزىلۋىنان دا شاش شامادان تىس ءتۇسۋى مۇمكىن. ايەلدەردە كوبىنەسە بوسانعاننان كەيىن شاشتىڭ ءتۇسۋى بايقالادى. دەگەنمەن بۇل - قالىپتى جاعداي.

بۇل جاعدايدا شاشتىڭ تۇسۋىمەن كۇرەسۋ بارىسىندا كوسمەتيكالىق راسىمدەردى تەك ارنايى مەديتسينالىق ءدارى- دارمەكپەن جانە مامانداردىڭ باقىلاۋىمەن جاساۋ كەرەك. سوندىقتان شاشتىڭ ءتۇسۋ سەبەپتەرىن ءبىلىپ الۋ وتە ماڭىزدى.