ەلباسى استانا قالاسىنداعى قۇرىلىستاردى سالۋ جوسپارىمەن تانىستى

استانا. قازاقپارات - قازاقستان پرەزيدەنتىنە استانا قالاسىن ودان ءارى دامىتۋدىڭ جانە تۇرعىن الابتاردا قۇرىلىس جۇرگىزۋدىڭ جوسپارى تانىستىرىلدى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى ەلوردا تۇرعىندارىنىڭ تۇرمىسى ءۇشىن جايلى جاعداي جاساۋدىڭ الەۋمەتتىك ماڭىزى جوعارى ەكەنىنە توقتالىپ، قالا قۇرىلىسىندا كەشەندى ءادىس قولدانۋدىڭ قاجەتتىگىن اتاپ ءوتتى.

نۇرسۇلتان نازاربايەۆ قالا حالقىن قولجەتىمدى الەۋمەتتىك نىساندارمەن، سونىڭ ىشىندە ءبىلىم بەرۋ جانە دەنساۋلىق ساقتاۋ مەكەمەلەرىمەن قامتاماسىز ەتۋدىڭ ماڭىزدىلىعىن ايتتى. سونىمەن قاتار، ەلباسى شاھاردى كوگالداندىرۋ، قالادا كولىك قاتىناسىن وڭتايلاندىرۋعا مۇمكىندىك بەرەتىن اۆتوتۇراقتار مەن جولايرىقتار سالۋ ماسەلەلەرىنە نازار اۋداردى.

استانا اكىمى ب. سۇلتانوۆ مەملەكەت باسشىسىنا ەلوردادا الەۋمەتتىك، كوممەرتسيالىق، اكىمشىلىك جانە تۇرعىن ءۇي نىساندارىن سالۋدىڭ جوسپارلارى تۋرالى مالىمدەپ، قالا ينفراقۇرىلىمىن دامىتۋدىڭ پەرسپەكتيۆالارى جونىندە باياندادى. قالا باسشىلىعىنىڭ اقپاراتىنا سايكەس، جىل باسىنان بەرى ەلوردادا 1,7 ميلليون شارشى مەتر تۇرعىن ءۇي پايدالانۋعا بەرىلگەن جانە 2018 -جىلدىڭ سوڭىنا دەيىن تاعى دا 2,3 ميلليون شارشى مەتر تۇرعىن ءۇي سالۋ جوسپارلانىپ وتىر.