بەندەر- ابباس پورتىندا قازاقستاننىڭ تەرمينالىن سالۋدان ءۇمىتتىمىز - ەلباسى

انكارا. قازاقپارات - بەندەر- ابباس پورتىندا قازاقستاننىڭ تەرمينالىن سالۋعا ۇمىتتەنەمىز. بۇل تۋرالى بۇگىن تۇركيانىڭ بيزنەس كاپيتاندارىمەن كەزدەسۋ بارىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«ەۋروپا مەن ازيا اراسىنداعى ترانسقۇرلىقتىق مۋلتيمودالدى تاسىمال بەلسەندى دامۋدا. ەلىمىز ارقىلى 5 تەمىر جولى جانە 6 حالىقارالىق اۆتوموبيل جولى وتەدى. ترانسكاسپي مۋلتيمودالدى تاسىمالدى دامىتۋ ماقساتىندا ءبىز كەيىنگى كەزدەرى وتە كوپ جۇمىس جاسادىق. «نۇرلى جول» باعدارلاماسى مەن قىتايدىڭ «جىبەك جولى» باعدارلاماسى بىرىگىپ، ۇلكەن جۇمىستار اتقارىلدى»، دەپ اتاپ ءوتتى نۇرسۇلتان نازاربايەۆ.

مەملەكەت باسشىسى قازاقستاننىڭ ۇلان-عايىر جەرىندە 4 جىلدىڭ ىشىندە 5 مىڭ شاقىرىم اۆتوموبيل جولى، 2,5 مىڭ شاقىرىم تەمىرجول سالىنعانىن اتاپ ءوتتى. سونىمەن قاتار قىتايدىڭ شىعىس جاعىندا، تىنىق مۇحيتى شەتىندەگى ليانيانگان پورتىندا قازاقستاننىڭ تەرمينالى سالىنعانىن ايتتى.

«سول پورت ارقىلى قىتاي، قازاقستان، رەسەي ارقىلى ەۋروپاعا ءوتىپ جاتقان كونتەينەرلەردىڭ سانى جىل سايىن ەكى ەسەگە ءوسىپ وتىرادى. ەندى قازىر ءبىز اقتاۋ پورتىن جاڭارتتىق، ونىڭ مۇمكىندىگى كەڭەيدى. قازاقستان- ازەربايجان- گرۋزيا- تۇركيا- كارس- كارتساحي جولىن پايدالاناتىن بولساق، جاڭادان مۇمكىندىكتەر پايدا بولادى. وسى جولدىڭ جوقتىعىنان ءبىز قارا تەڭىز، رەسەي ارقىلى كەلىپ وتىراتىنبىز. ول قيىن ەدى. قازىر تىكەلەي جولمەن شىعۋعا مۇمكىنشىلىك بار، پايدالانۋىمىز كەرەك»، - دەدى مەملەكەت باسشىسى.