گەرمانيادا تۇراتىن قازاق قىزى كيكبوكسينگتەن الەم چەمپيونى اتاندى

 استانا. قازاقپارات - گەرمانيادا تۇراتىن ياسمين قارابازار ەسىمدى ارۋ كيكبوكسينگ پەن مۋايتايدان ەۋروپا جانە گەرمانيا چەمپيوناتتارىندا جەڭىس تۇعىرىنان كورىندى.

بويجەتكەن بيىل كيەۆتە وتكەن الەم بىرىنشىلىگىندە دە چەمپيون اتانعان دەپ حابارلايدى «ازاتتىق» راديوسى.

ميۋنحەن قالاسىندا ءومىر سۇرەتىن بويجەتكەن سپورتقا 14 جاسىندا كەلگەنىن ايتادى. ول 2017 -جىلى مۋايتايدان ەۋروپا چەمپيوناتىندا جەڭىسكە جەتكەن ەكەن.

سول سايىستا ياسمينگە قازاقستان تۋىن الىپ شىعۋعا رۇقسات بەرىلىپتى.

ارۋ سپورتپەن بىرگە جۇمىس تا ىستەپ ۇلگەرەدى. ول ميۋنحەندەگى بالاباقشالاردىڭ بىرىندە تاربيەشى، كيكبوكسينگتەن جاسوسپىرىمدەردى جاتتىقتىرۋشى قىزمەتتەرىن اتقارۋدا.

گەرمانيادا قازاق جاستارىنىڭ سپورتقا قىزىعۋشىلىعى تومەن ەكەنىن ايتقان ول وتانىنا كەلگىسى كەلەتىنىن جاسىرمادى.

«بولاشاقتا قازاقستانعا بارسام دەپ تە ارماندايمىن. تۋىستارىمنىڭ كوبى الماتى جاقتا تۇرادى. قازاقستاندا وتەتىن سپورت جارىستارىنا قاتىسىپ كورمەدىم. جاقىندا گەرمانياداعى قازاقستان ەلشىلىگىنە بارىپ، جارىسقا قاتىسقىم كەلەتىنىن ايتتىم. ولار «قازاقستانعا حات جىبەردىك» دەدى. قازىر قازاقستاننان شاقىرتۋ كۇتىپ ءجۇرمىن»، - دەدى ارۋ.

ياسميننىڭ اناسى ايشا قارابازاردىڭ ايتۋىنشا، ولاردىڭ اتالارى قىزىلورادادان بولعان. ال جانۇيانىڭ گەرمانياعا قونىس اۋدارعانىنا 40 جىلدان اسىپ بارادى ەكەن.

«قىز بالاسىڭ عوي. ساعان سپورت قول ەمەس، وقى» دەدىك. ءبىراق «سپورتشى بولامىن» دەپ كۇش بەرمەدى. ءوزى تۇرىپ، ءوزى جىعىلىپ، اياعىندا سپورتشى بولدى. وقۋىن دا جاقسى وقىدى. جۇمىسىن دا ىستەپ ءجۇر. ەندىگى ءبىر ارمانى - قازاقستانعا بارىپ قايتۋ»، - دەدى ياسميننىڭ اناسى.