رەسپۋبليكالىق جولداردا كولىكتى جاپپاي توقتاتۋعا تىيىم سالىنادى

استانا. قازاقپارات - پارلامەنت ءماجىلىسىنىڭ دەپۋتاتتارى كولىك ماسەلەلەرى بويىنشا كەيبىر زاڭنامالىق وزگەرىستەردى تالقىلاۋعا كىرىستى.

سونىڭ ىشىندە رەسپۋبليكالىق جولداردا كولىك قۇرالدارىن جاپپاي توقتاتۋ تاجىريبەسىنە تىيىم سالۋ ماسەلەسى دە بار، دەپ حابارلايدى قازاقپارات ءتىلشىسى.

ق ر ينۆەستيتسيالار جانە دامۋ ۆيتسە- ءمينيسترى تيمۋر توقتابايەۆتىڭ ايتۋىنشا، كولىكتى توقتاتۋدىڭ ناقتى سەبەپتەرىن ەنگىزۋ جوسپارلانعان. اتاپ ايتقاندا، اۆتوماتتاندارىلعان جۇيەدە تىركەلگەن زاڭبۇزۋشىلىقتار بولسا، كولىكتى توقتاتۋعا رۇقسات بەرىلەدى.

بۇدان بولەك، كولىك قۇرالى تىركەۋسىز جۇرسە، سونداي- اق، ارنايى شارالار كەزىندە اۆتوموبيلدەر جاپپاي توقتاتىلادى. مينيسترلىك شەتەلدىك كولىك قۇرالدارىن توقتاتۋ تاجىريبەسىن دە قالدىرۋدى ۇسىنىپ وتىر.

«وسى ءتارتىپتىڭ ارقاسىندا 100 مىڭ اۋىر جۇك كولىگىن توقتاتۋدى قىسقارتىپ، جۇك تاسىمالداۋ جىلدامدىعىن ارتتىرۋعا بولادى. ارينە، سىبايلاس جەمقورلىق ارەكەتتەرى دە ازايادى» ، - دەدى ت. توقتابايەۆ ماجىلىستە زاڭ جوباسىن تانىستىرۋ كەزىندە.

ونىڭ ايتۋىنشا، اقپاراتتىق جۇيەلەردى اۆتوماتتاندىرىلعان ولشەۋ قۇرالدارىمەن ينتەگراتسيالاۋدىڭ ارقاسىندا بارلىق مالىمەتتەردى الدىن الا تىركەپ وتىرۋعا مۇمكىندىك بار. تەحنيكالىق تەكسەرىس، تولەنبەگەن ايىپپۇلدار، رۇقسات قاعازداردىڭ بار- جوعى - وسىنىڭ ءبارىن بىردەن الىپ، كولىك قۇرالدارىن كىدىرىسسىز وتكىزۋگە بولادى.