قازاقستان مەن قىرعىز شەكاراسى حالىقارالىق قۇقىقتىق دەڭگەيدە بەكىتىلەدى
ەكى ەل اراسىنداعى شەكارانى شەگەندەۋ تۋرالى شارتقا 2017 -جىلعى 25 - جەلتوقساندا استانادا قىرعىز رەسپۋبليكاسى مەملەكەت باسشىسىنىڭ قازاقستانعا رەسمي ساپارى شەڭبەرىندە قازاقستان پرەزيدەنتى نۇرسۇلتان نازاربايەۆ جانە قىرعىز پرەزيدەنتى سوورونباي جەەنبەكوۆ قول قويعان.
ق ر سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردىنىڭ ايتۋىنشا، شارتتىڭ باستى ماقساتى - قازاقستان مەن قىرعىزستان اراسىنداعى شەكارا سىزىعىن حالىقارالىق قۇقىقتىق دەڭگەيدە بەكىتۋ. «شەكارانى شەگەندەۋ ناتيجەسىندە مەملەكەتتىك شەكارا سىزىعىنىڭ ۇزىندىعى 1257,07 شاقىرىمدى قۇرادى. شەكارا سىزىعىندا 1055 شەكارالىق باعانا ورناتىلدى» ، - دەدى مينيستر ورىنباسارى. ونىڭ سوزىنە قاراعاندا، اتالعان شارت مەرزىمسىز بولىپ تابىلادى ءارى دەنونساتسيالاۋعا جاتپايدى. ال شارتتىڭ كۇشىنە ەنۋى قازاقستاننىڭ مەملەكەتتىك شەكاراسىنىڭ حالىقارالىق قۇقىقتىق راسىمدەۋ پروتسەسىنىڭ اياقتالۋىنا، قىرعىز رەسپۋبليكاسىمەن اۋماقتىق داۋلاردىڭ تۋىنداۋىنىڭ الدىن الا جويۋعا ىقپال ەتەدى.
«قازاقستاننىڭ سىرتقى ساياساتىنىڭ نەگىزگى باعىتتارىنىڭ ءبىرى - ەلىمىزدىڭ ۇلتتىق قاۋىپسىزدىگىن قامتاماسىز ەتۋگە مۇمكىندىك بەرەتىن مەملەكەتتىك شەكارانى حالىقارالىق قۇقىقتىق راسىمدەۋ بولىپ تابىلادى. قالىپتاسقان گەوساياسي جاعدايلارلا شەكارانى شەگەندەۋدىڭ مۇمكىندىگىنشە جاقىن مەرزىمدە اياقتاۋ مەملەكەتىمىزدىڭ اۋماقتىق تۇتاستىعىنا، شەكارانىڭ مىزعىماستىعىنا جانە ەل ەگەمەندىگىنە تۋدىرۋى مۇمكىن قاۋىپ- قاتەرلەردى بولدىرماۋ ءۇشىن ەرەكشە وزەكتى بولىپ تابىلادى» ، - دەدى مۇحتار تىلەۋبەردى.
تالقىلاۋ بارىسىندا دەپۋتاتتار مەملەكەتتىك شەكارانى شەگەندەۋدە ەلباسىنىڭ ەڭبەگى ەرەن ەكەنىن اتاپ ءوتتى.
«تاۋەلسىزدىكتىڭ العاشقى كۇنىنەن باستاپ ەلباسى نۇرسۇلتان نازاربايەۆ مەملەكەتتىك شەكارامىزدى قۇقىقتىق راسىمدەۋ ماسەلەسىنە ەرەكشە نازار اۋدارىپ كەلەدى. پرەزيدەنت ءوزىنىڭ «تاۋەلسىزدىك ءداۋىرى» اتتى كىتابىندا: «قازاقستاننىڭ مەملەكەتتىك شەكاراسىن ساياسي راستاۋدىڭ، زاڭ جۇزىندە راسىمدەۋدىڭ جانە حالىقارالىق دارەجەدە مويىندالۋىنىڭ تاريحي ماڭىزىن ايتىپ جەتكىزۋ مۇمكىن ەمەس. دوستار ءۇشىن اشىق، جات پيعىلدىلار ءۇشىن جابىق مەملەكەتتىك شەكارانىڭ بەكىتىلۋى قازاقستان رەسپۋبليكاسىنىڭ ەگەمەندىگىن ايگىلەي ءتۇستى، ۇزاق مەرزىمگە تۇراقتى بەيبىتشىلىكتى قامتاماسىز ەتتى» دەپ اتاپ وتكەن بولاتىن. مەملەكەتتىك شەكارا بۇۇ جارعىسىمەن جانە ەۋروپاداعى قاۋىپسىزدىك جانە ىنتىماقتاستىق ۇيىمىنىڭ 1975 -جىلعى قورىتىندى اكتىسىمەن بەكىتىلگەن ىرگەلى حالىقارالىق قۇقىق قاعيداتتارىنىڭ ءبىرى بولىپ تابىلادى. وسىنى ەسكەرسەك، بۇل شارت ەلىمىز ءۇشىن ەرەكشە ماڭىزدى» ، - دەدى دەپۋتات قوجاحان جاباعيەۆ.
ونىڭ سوزىنە قاراعاندا، شارت ەكى ەل اراسىنداعى ەكىجاقتى ىنتىماقتاستىقتىڭ 150 دەن استام قۇجاتتان تۇراتىن شارت- قۇقىقتىق بازاسىن تولىقتىرادى. بۇدان باسقا، شارتتا مەملەكەتتىك شەكارانىڭ باستاپقى جانە سوڭعى ءتۇيىسۋ نۇكتەلەرى ايقىندالعان.
«ءبىر سوزبەن ايتقاندا بۇگىنگى شارت باۋىرلاس ەلدەر اراسىنداعى مەملەكەتتىك شەكارانى حالىقارالىق- قۇقىقتىق راسىمدەۋ پروتسەسىن تولىعىمەن اياقتاپ، ەكى مەملەكەتتىڭ ءوزارا سىيلاستىعى مەن ەگەمەندىك، تەڭدىگىن جانە اۋماقتىق تۇتاستىعىنىڭ بەرىك نەگىزىن جاسايدى» ، - دەدى دەپۋتات.
ءماجىلىس ماقۇلداعان زاڭ جوباسى سەناتقا جولدانادى.