تۇركيادا «قازاقستان كۇنى» ءوتتى

استانا. قازاقپارات - تۇركيا استاناسى انكارا قالاسىندا «قازاقستان كۇنى» ءوتتى، دەپ حابارلايدى قازاقپارات.

قازاقستان رەسپۋبليكاسىنىڭ تۇركياداعى ەلشىلىگىنەن ءمالىم ەتكەندەي، شارا ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا جانە استانا قالاسىنىڭ 20 جىلدىعىنا وراي ۇيىمداستىرىلعان. قازاقستاننىڭ تۇركياداعى ەلشىلىگىنىڭ شاقىرۋىمەن ەتيمەسگۋت اۋدانىنىڭ مەرياسى ۇيىمداستىرعان «انادولۋ» فەستيۆالىندە جامبىل وبلىسى شۋ اۋدانىنىڭ «اسەم اۋەن» فولكلورلىق ءانسامبلى ونەر كورسەتتى. شارا باستالماس بۇرىن ونەر ۇجىمى قالانىڭ كورىكتى ورىندارىن ارالاپ، ەتيمەسگۋت اۋدانىنىڭ ءمەرى ءانۋار دەميرەلدىڭ قابىلداۋىندا بولدى.

شىعارماشىلىق دەلەگاتسيانى جامبىل وبلىستىق مادەنيەت، ارحيۆتەر جانە قۇجاتتاما باسقارماسىنىڭ باس مامانى ەركەجان سەمبايەۆا، وبلىستىق حالىق شىعارماشىلىعى ورتالىعىنىڭ كوركەمدىك جەتەكشىسى ەلميرا دۇتبايەۆا، شۋ اۋدانى اكىمىنىڭ ورىنباسارى كلارا قوجاعاپپانوۆا، ءانسامبلدىڭ كوركەم جەتەكشىسى، قازاقستاننىڭ ەڭبەك سىڭىرگەن قايراتكەرى اۋەسحان كەلگەنبايەۆ باستاپ كەلدى.

جۇزدەسۋ بارىسىندا انادولۋ فەستيۆالىنىڭ ماڭىزى مەن ونىڭ تۇركى ىنتىماعىنا تيگىزەر ىقپالى جايىندا اڭگىمە ءوربىدى. جازۋشى-اۋدارماشى مالىك وتاربايەۆ فەستيۆالدىڭ ءساتتى وتۋىنە تىلەكتەستىك ءبىلدىردى. ۇزاق جىلدان بەرى قازاق ونەرى مەن مادەنيەتىن، ادەبيەتىن تۇركيا تورىندە ناسيحاتتاپ، ەكى ەل اراسىندا تىعىز قارىم-قاتىناس ورناتۋعا ۇلەس قوسىپ كەلە جاتقان ەتيمەسگۋت مەرى ءانۋار دەميرەلگە جامبىل حالىقارالىق سىيلىعى مەن توسبەلگىسى تابىس ەتىلدى. بيىل 15-مارتە ۇيىمداستىرىلىپ وتىرعان ونەر مەرەكەسىنە الىس-جاقىن تۇركىتىلدەس مەملەكەتتەردەن جانە تۇركيا اۋماعىنداعى بارلىق قالالار مەن پروۆينتسيالاردان شىعارماشىلىق توپتار شاقىرىلدى.

ولار ون كۇن بويى انادولۋ جەرىن دۋمانعا بولەپ، ۇلتتىق فولكلورىن پاش ەتەتىن بولادى. «اسەم اۋەن» فولكلورلىق ءانسامبلى كورەرمەندەر نازارىنا «ءابدىمومىن جەلدىبايەۆتىڭ «ەركە سىلقىم»، مەلس وزبەكوۆتىڭ «تولقيدى شۋىم»، ەسكەندىر حاسانعاليەۆتىڭ «اتامەكەن»، ارمان بەكسۇلتاننىڭ «ەلگە تىلەك» جانە مايلىقوجانىڭ «وسيەت» تەرمەسى مەن «جان ەركەم»، «قۇربىم- اي»،  «دەي سالدىم- اي»، «اۋىلىڭ سەنىڭ ىرگەلى» سىندى حالىق اندەرىن تارتۋ ەتتى.

جاس قوبىزشى ءبىرعانىم مىرزاحان حالىق ءانى «يليگايدى» ورىنداپ، باۋىرجان ۇيسىنبايەۆ تۇرىك ءانى «دۋ-دۋدى» ناقىشىنا كەلتىرە شىرقادى. انسامبل انشىلەرى مادەنيەت قايراتكەرى جانات دوسجانوۆا، ايگۇل ديقانوۆا، نۇربولات ىڭكاربەكوۆ تە جوعارى دەڭگەيدە ونەر كورسەتىپ، قازاق ەلىنىڭ ۇلتتىق ونەرىن لايىقتى تانىستىرا ءبىلدى.

قازاقستان ونەرپازدارىن 50 مىڭ كورەرمەن تاماشالاپ، بەنگۇ تۇرىك ارناسى تىكەلەي ەفيردەن تاراتتى. كەش سوڭىندا قازاقستاننىڭ تۇركياداعى ەلشىسى ابزال ساپاربەك ۇلى ءسوز سويلەپ، كونە تاراز تورىنەن، قاسيەتتى تالاس جەرىنەن كەلگەن ونەر يەلەرى مەن شارانى ۇيىمداستىرعان ەتيمەسگۋت اۋدانى مەرياسىنا العىس ءبىلدىردى.

ءوز كەزەگىندە شۋ اۋدانى اكىمىنىڭ ورىنباسارى كلارا قوجاعاپپانوۆا جامبىل وبلىسى اكىمى اسقار مىرزاحمەتوۆ پەن شۋ اۋدانىنىڭ اكىمى قايرات دوسايەۆتىڭ ىستىق سالەمى مەن جىلى لەبىزىن جەتكىزدى. سونداي-اق مەر انۋار دەميرەل مەن ەلشى ابزال ساپاربەك ۇلىنىڭ يىعىنا شاپان جاۋىپ، تاراز قولونەر شەبەرلەرىنىڭ جىر الىبى جامبىل جابايەۆتىڭ بەينەسىن قولمەن توقىعان كىلەمشەنى سىيعا تارتتى.

جامبىل وبلىسى ونەرپازدارىنىڭ گاسترولدىك ساپارى ارى قاراي نيگدە، كاپادوكيا، كاستامونۋ قالالارىندا جالعاسىن تابادى.