ۆەنەتسيادا قازاقستاندىق فيلمدەر كورسەتىلەدى
«ەۋرازيا» حالىقارالىق كينوفەستيۆالىنىڭ ديرەكسياسىمەن ۇيىمداستىرىلاتىن بىرەگەي شارا يتاليا ۇلتتىق كينەماتوگرافيالىق، اۋديوۆيزۋالدى جانە مۋلتيمەديالىق ونىمدەرى قاۋىمداستىعىنىڭ (ANICA) ارقاسىندا مۇمكىن بولىپ وتىر، دەپ حابارلايدى قازاقپارات ءتىلشىسى كينوفەستيۆالدىڭ باسپا ءسوز قىزمەتىنە سىلتەمە جاساپ.
«قازاقستان جايلى ءبىلىڭىز: اۋديوۆيزۋالدى دامۋدىڭ جاڭا شەكارالارى» اتتى شارادا مىنا قازاقستاندىق كارتينالار كورسەتىلەدى: «وزەن» (رەج. ە. بايعازين)، «ارۋاق» (رەج. ح. احمەتوۆ)، «امىرە» (رەج. د. ۆەسپا)، «تالان» (رەج. ب. قالىمبەتوۆ)، «ول» (رەج. ا. ساتايەۆ)، «الماس قىلىش» (رەج. ر. ءابدىراشوۆ)، «اناعا اپارار جول» (رەج. ا. ساتايەۆ)، «ورالمان» (رەج. س. قۋۇمانبەكوۆ)، «ءبىزدىڭ قالانىڭ كىشكەنتاي حانزاداسى» (رەج. ت. تەمەنوۆ)، «شىڭىراۋ» (رەج. ج. جەتىرۋوۆ)، «جات» (رەج. ە. تۇرسىنوۆ). سونىمەن بىرگە، «كۇلتەگىن» (رەج. ا. ءابىلدينوۆ)، «Jumper» (رەج. ارمان بەيسەمبايەۆ) پەن «مۇزبالاق» (رەج. ت. مايدان مەن ت. تولەۋعازى) انيماتسيالىق فيلمدەرىنىڭ ترەيلەرى پاش ەتىلمەك.
«قازاقستاندىق كينەماتوگرافيستەر مەن ونەر قايراتكەرلەرى ءۇشىن بۇل وتە ماڭىزدى بولىپ تابىلادى. سەبەبى، مۇنداي شارالار كوبىنەسە ءبىزدىڭ كينو مەن مادەنيەت سالاسىنىڭ وركەندەۋىنە ۇلەس قوسادى. وسىعان بايلانىستى مەن ANICA يتاليالىق كومپانياسىنىڭ حالىقارالىق دەپارتامەتىنىڭ باسشىسى روبەرتو ستابيلەگە ەرەكشە العىسىمدى ايتقىم كەلەدى. جالپى، ۆەنەتسيادا ونەردىڭ وتە جوعارى باعالاناتىنىن بىلەمىز. ءبىزدىڭ شارانىڭ ۆەنەتسيالىق كينوفەستيۆالمەن تۇسپا-تۇس ۇيىمداستىرىلىپ جاتقانى قۋانتادى»، - دەيدى «ەۋرازيا» حالىقارالىق كينوفەستيۆالىنىڭ پرەزيدەنتى ايمان مۇساقوجايەۆا.
سونىمەن قاتار، شارا اياسىندا قۇرىلتايشىسى قازاقستان رەسپۋبليكاسىنىڭ مادەنيەت جانە سپورت مينيسترلىگى بولىپ تابىلاتىن «ەۋرازيا» كينوفەستيۆالى تانىستىرىلادى. «ەۋرازيا» - حالىقارالىق كينوپروديۋسسەرلەر قاۋىمداستىعىنىڭ فەدەراتسياسىندا (FIAPF) تىركەلگەن ورتالىق ازياداعى ءىرى كينوفورۋم.
ۆەنەتسياعا قازاقستان جاقتان رەجيسسەرلەر بولات قالىمبەتوۆ، توقتار قارساقبايەۆ، تالعات تەمەنوۆ، اكتەرلار سانجار ماديەۆ بارادى.