الماتىدا قالاي باسپانالى بولۋعا بولادى

الماتى. قازاقپارات - الماتىدا «نۇر وتان» پارتيا فيليالىنىڭ باسپا ءسوز ورتالىعىندا ماماندار الماتىدا قالاي پاتەر الۋعا بولاتىنى جونىندە ايتىپ بەردى، دەپ حابارلايدى قازاقپارات ءتىلشىسى.

«الدىڭعى جىلدارمەن سالىستىرعاندا بۇگىن قازاقستاندىقتارعا باسپانالى بولۋعا بىرنەشە مۇمكىندىك بار. «نۇرلى جەر» جانە «الماتى جاستارى» سەكىلدى اۋقىمدى باعدارلامالار جۇزەگە اسىرىلۋدا. 7-20-25 باعدارلاماسىنىڭ ىسكە اسىرىلۋى بۇل تۇرعىدا ۇلكەن سەرپىن بەرەدى» ، - دەدى «نۇر وتان» پارتياسى الماتى قالالىق فيليالى ءتوراعاسىنىڭ ورىنباسارى ستانيسلاۆ كانكۋروۆ.

شاراعا قاتىسقان «تۇرعىن ءۇي قۇرىلىس جيناق بانكى» اق ءتورايىمى ءلاززات يبراگيموۆانىڭ ايتۋىنشا، قازىرگى تاڭدا جيناقتاۋ جۇيەسى بويىنشا «الماتى جاستارى» باعدارلاماسى، «نۇرلى جەر» ، «ءوز ءۇيىم» باعدارلاماسى بويىنشا باسپانا الۋعا بولادى. الايدا، بانكتىڭ قوياتىن ءبىرقاتار شارتى بار.

«الماتى جاستارى» بويىنشا كليەنتتىڭ (وتباسى بولسا، ەكەۋىنىڭ دە) جاسى 35 كە تولماۋى كەرەك. ءارى الماتىدا تۇرعىلىقتى مەكەنجايعا 1  جىل تىركەۋدە بولۋى ءتيىس. ال «نۇرلى جەر» باعدارلاماسى بويىنشا كليەنتتىڭ 3  جىلدىق تۇرعىلىقتى مەكەنجايى بولۋى شارت. سونىمەن قاتار، ادامنىڭ اتىندا سوڭعى 5 جىلدا باسپانا تىركەلمەگەن بولۋى ءتيىس. «ءوز ءۇيىم» باعدارلاماسى بويىنشا تۇرعىلىقتى مەكەنجاي بولۋى شارت ەمەس. پايىزدىق مولشەرلەمە%8,5 دان% 7 عا ءتۇستى» ، - دەدى ءلاززات يبراگيموۆا.

ونىڭ ايتۋىنشا، اتالعان بانك «7-20-25» باعدارلاماسى بويىنشا شارتتاردى «باسپانا» ارنايى كومپانياسىمەن كەلىسىپ جاتىر. ازىرگە قۇجات قاشان دايىن بولارى بەلگىسىز.

ال «باسپانا» يپوتەكالىق كومپانياسى ءتوراعاسى قايرات التىنبەكوۆتىڭ ايتۋىنشا، «7-20-25» باعدارلاماسى بويىنشا 1 اي كولەمىندە جالپى سوماسى 15 ميلليارد تەڭگە كولەمىندە نەسيەگە ءوتىنىم ءتۇستى. ونىڭ ىشىندە 10 ميلليارد تەڭگەنىڭ ءوتىنىمى ماقۇلداندى.

«اتالعان باعدارلاماعا سۇرانىس وتە جوعارى. ياعني، ەگەر ادام 12 ميلليون تەڭگەنىڭ باسپاناسىن ساتىپ الامىن دەسە، ونىڭ 20 پايىزىن، ياعني 2 ميلليون تەڭگەسىن الدىن الا قۇيادى. قالعان 10 ميلليون تەڭگە 20 جىلعا 7 پايىزبەن بەرىلەدى. ياعني، ايلىق تولەم 71 مىڭ تەڭگە بولادى. ءبىز 5  جىلدا «7-20-25» بويىنشا 1 تىريلليون تەڭگەنىڭ زايمىن بەرۋدى جوسپارلاپ وتىرمىز» ، - دەدى قايرات التىنبەكوۆ.

ونىڭ ايتۋىنشا، باعدارلاماعا قاتىسۋدىڭ باستى شارتى - اتىڭىزدا باسپانا ءارى يپوتەكالىق نەسيە بولماۋى قاجەت.

«ەگەر، اتىڭىزدا باسپانا بولعان بولسا، ءسىز ونى ساتىپ جىبەرىپ نەمەسە بىرەۋگە اۋدارىپ جىبەرىپ، كەلەسى كۇنى كەلسەڭىز دە بانك ءسىزدىڭ ءوتىنىشىڭىزدى قابىلدايدى. ەڭ باستىسى شارت جاساسقان كەزدە اتىڭىزدا ءۇي تىركەلىپ تۇرماۋى قاجەت» ، - دەدى قايرات التىنبەكوۆ.

  ايتا كەتسەك، ق ر ۇلتتىق بانكى ءتوراعاسى اتالعان باعدارلامانىڭ وپەراتورى «باسپانا» يپوتەكالىق ۇيىمى بولاتىنىن 5 - مامىردا ايتقان ەدى. ۇلتتىق بانك بەكىتكەن باعدارلاما بويىنشا يپوتەكالىق نەسيە %7 جىلدىق مولشەرلەمەمەن 25 جىلعا بەرىلەدى. كەلەسى شارتتارىنىڭ ءبىرى - العاشقى سالىم بولماق. جاڭا يپوتەكالىق زايىمداردى كەز- كەلگەن قازاقستان ازاماتى الا الادى. ول ءۇشىن ەڭ باستى شارت - ادامنىڭ باسىندا جىلجىمايتىن مۇلكى بولماۋى كەرەك. باعدارلاما بويىنشا قازاقستاننىڭ كەز- كەلگەن وڭىرىنەن الماتى، استانا، اتىراۋ قالالارىنان ەڭ ماكسيمالدى 25 ميلليون تەڭگەگە، قالعان وڭىرلەردە 15 ميلليون تەڭگەگە باسپانا ساتىپ الۋعا بولادى.

 كليەنتتەر بانك تسەنتركرەديت، ەۋرازيا بانكى، اتف بانك، بانكRBK، حالىق بانكى، تسەسنابانك، تۇرعىن ءۇي قۇرىلىس جيناق بانكى ارقىلى نەسيە الا الادى. جىل سوڭىنا دەيىن بۇل تىزىمگە سبەربانك پەن Forte بانك قوسىلۋى مۇمكىن.

2018 -جىلدىڭ 9 - تامىزداعى احۋالعا سايكەس قالادا جالپى قۇنى 6,6 ميلليارد تەڭگە بولاتىن 522 ءوتىنىم بەرىلگەن. بارلىعى 312 ءوتىنىم ماقۇلداندى. ال، جالپى قازاقستان بويىنشا 315 ءوتىنىم بويىنشا نەسيە بەرىلدى. ونىڭ 128 ءى الماتى تۇرعىندارىنا بەرىلدى. بۇل رەسپۋبليكا بويىنشا 44 پايىزدى قۇرايدى.