استانادا وتەتىن قازاق كۇرەسىنە شەتەلدىك تورەشىلەر تورەلىك ەتەدى
چەمپيوناتتا 16 سپورت تورەشىسى جۇمىس ىستەيدى. ولاردىڭ اراسىندا قازاقستان، گرۋزيا، وزبەكستان، ليتۆا، ۋكراينا تورەشىلەرى بولادى.
حالىقارالىق دارەجەدەگى تورەشى ماقسات احمەتبەكوۆتىڭ ايتۋىنشا قازاقستان اتىنان ازيا چەمپيوناتىندا سەگىز تورەشى جۇمىس ىستەيدى.
«بارىنشا ءادىل تورەلىك ەتەمىز دەگەن ويدامىز. قازاقستاندىق تورەشىلەردىڭ بىلىكتىلىگى جوعارى دەڭگەيدە. «قازاقستان بارىسىندا»، قازاقستان چەمپيوناتىندا، ءىرى تۋرنيرلەردە تورەشىلىك جاساپ جۇرگەندەردىڭ اراسىنان ىرىكتەپ الدىق. ال شەتەلدىك تورەشىلەرگە شەبەرلىك ساباعى وتكىزىلەتىن بولادى»، - دەدى ول.
قازاق كۇرەسىنەن چەمپيوناتقا 20 مەملەكەتتەن 80 سپورتشى قاتىسادى. جارىس 8 سالماقتىق جانە ابسوليۋتتىك دارەجە بويىنشا وتەدى.
قازىرگى تاڭدا ازيا چەمپيوناتىنا قاتىسۋعا جاپونيا، وزبەكستان، تاجىكستان، موڭعوليا، يران، پاكىستان مەن ءۇندىستان مەملەكەتتەرى وزدەرىنىڭ مىقتى دەگەن سپورتشىلارىن دايىنداپ وتىر.
قازاق كۇرەسىنەن ۇلتتىق قۇرامانىڭ باس باپكەرى ەرلان ەستەك قازاقستاندىق بالۋانداردىڭ دايىندىعى تۋرالى ايتىپ بەردى.
«ازيا چەمپيوناتىنا 9 سالماق دارەجەسىندە بالۋاندار قاتىسادى. تامىزدىڭ 12 سىنەن 24 ىنە دەيىن بۋراباي اۋدانىنداعى «جاقسى» سپورت كەشەنىندە وقۋ- جاتتىعۋ جيىنىندا دايىندالادى. 25 -تامىز كۇنى استانادا سالماق ولشەۋ ءراسىمى وتەدى. 26 سى كۇرەسەدى. بالۋانداردىڭ دايىندىعى وتە جاقسى. دايىندىقتىڭ ءبىرىنشى كەزەڭىن شىمكەنت قالاسىندا، ەكىنشى كەزەڭىن گرۋزيا مەملەكەتىندە وتكىزدىك. ءۇشىنشى كەزەڭ ەندى باستالادى»، - دەدى ول.
ازيا چەمپيوناتى قازاقستان رەسپۋبليكاسىنىڭ مادەنيەت جانە سپورت مينيسترلىگى، استانا قالاسىنىڭ اكىمدىگى، «سامۇرىق قازىنا» ءال-اۋقات قورى، ERG ەۋرازيالىق توبىنىڭ قولداۋىمەن جۇزەگە اسۋدا. ۇيىمداستىرۋشى «حالىقارالىق قازاق كۇرەسى فەدەراتسياسى» .
ايتا كەتسەك، قازاق كۇرەسى (Qazaq kuresi) ۇلتتىق سپورت ءتۇرى عانا ەمەس، ول يۋنەسكو- نىڭ ماتەريالدىق ەمەس مۇرالار تىزىمىنە كىرەدى. بىلتىر حالىقارالىق Qazaq kuresi فەدەراتسياسى قۇرىلىپ، ق ر ەنەرگەتيكا ءمينيسترى قانات بوزىمبايەۆ فەدەراتسيا پرەزيدەنتى بولىپ سايلاندى. جىل سايىن وسى سپورت تۇرىنەن بىرنەشە حالىقارالىق جانە رەسپۋبليكالىق جارىستار وتەدى. سونىڭ ءبىرى 2017 -جىلى وتكەن الەم چەمپيوناتىنا 40 ەلدەن 160 بالۋان قاتىستى.