وسكار سىيلىعىنا جاڭا جۇلدە ەنگىزىلدى

استانا. قازاقپارات - امەريكا كينواكادەمياسىنىڭ باسشىلار كەڭەسى «وسكار» سىيلىعىنا «ۇزدىك تانىمال فيلم» نوميناتسياسىن قوسۋدى قولداپ داۋىس بەردى.

«كوپشىلىككە باعىتتالعان كينو ىشىندەگى ەڭ ۇزدىگىنە ارنايى جاڭا نوميناتسيا قوسىپ وتىرمىز. ولاردى ىرىكتەۋ مەن باسقا دا تالاپتار بويىنشا كەيىنىرەك تولىق حابارلايمىز»، - دەلىنگەن اكادەميا باسشىلارىنىڭ حاتتاماسىندا.

جاڭا كاتەگوريادان بولەك، كينواكادەميا ماراپاتتاۋ راسىمىنە دە ءبىرقاتار وزگەرىستەن ەنگىزەدى دەپ حابارلاندى. ەندىگىدە تانىمالدىعى از كاتەگوريالار تەلەارنادا تىكەلەي ەفيردە كورسەتىلمەيتىن بولادى.

بۇل ەفيردەگى سالتاناتتى ءراسىم ۋاقىتىن ازايتادى. سونىمەن قاتار، 92- ماراپاتتاۋ ءراسىمى وزگە كينوپرەميالاردان العا شىعۋ ءۇشىن، حابارلانعانداي 2020 -جىلى 23 -اقپاندا ەمەس، 9 -اقپاندا وتەدى. ال 91- ماراپاتتاۋ ءراسىمىنىڭ ۋاقىتى سول قالپىندا قالادى. ول 2019 -جىلى 23 -اقپاندا لوس-اندجەلەستەگى Dolby تەاترىندا بولادى.