تايلاند قازاقستانمەن اراداعى اۋە قاتىناسىن ارتتىرۋعا مۇددەلى
«كەلىسسوزدەردى تايلاندتىڭ اۆياتسيالىق بيلىك ورگانىنىڭ باس ديرەكتورى چۋلا سۋكمانوپ پەن ق ر ي د م ازاماتتىق اۆياتسيا كوميتەتىنىڭ ءتوراعاسى تالعات لاستايەۆ جۇرگىزدى. كەزدەسۋ بارىسىندا تاراپتار كود-شەر ىنتىماقتاستىعىن پايدالانۋ، ەكى جاقتىڭ اۋماعىندا ۇشۋ ءارى قونۋ پۋنكتتەرى، ۇشۋ قاۋىپسىزدىگى جانە باسقا دا ماسەلەلەردى تالقىلادى»، - دەلىنگەن ق ر ي د م مالىمەتىندە.
قازىرگى ۋاقىتتا ەكى ەل اراسىنداعى اۋە بايلانىسى «ەير استانا» كومپانياسى اپتاسىنا 5 رەت ورىندايتىن «الماتى - بانگكوك» (قىستا اپتاسىنا ەكى رەيس قوسىلادى) جانە اپتاسىنا 3 رەت ورىندايتىن «استانا -بانگكوك» تۇراقتى تىكەلەي رەيستەرى ارقىلى ورناتىلعان.
جۇرگىزىلگەن كەلىسسوزدەر ناتيجەسىندە، قازاقستاندىق «ەير استانا» كومپانياسى ءۇشىنشى ەلدەردىڭ اۋە كومپانيالارىمەن كود-شەر ۋاعدالاستىقتار جاساۋ قۇقىعىنا يە بولدى. جاڭا ءتارتىپ قازاقستاندىق جولاۋشىلارعا وسى باعىتتا جاڭا مۇمكىندىكتەر اشىپ، ەلىمىزدىڭ ترانزيتتىك الەۋەتىن ودان ءارى دامىتۋعا ىقپال ەتەدى.