شوتلانديادا «اقبايان» سپەكتاكلى كورسەتىلدى

قىزىلوردا. قازاقپارات - شوتلانديانىڭ ەدينبۋرگ قالاسىندا ءوتىپ جاتقان «فريندج» ونەر فەستيۆالىندە بۇگىن قىزىلوردا وبلىستىق قازاق مۋزىكالىق دراما تەاترىنىڭ «اقبايان» سپەكتاكىلىنىڭ كورسەتىلىمى ءوتتى، دەپ حابارلايدى قازاقپارات ءتىلشىسى وبلىس اكىمدىگىنە سىلتەمە جاساپ.

 شوتلانديانىڭ ەدينبۋرگ قالاسىندا 3 - تامىز كۇنى باستالعان ونەر فەستيۆالى 27 - تامىزعا دەيىن جالعاسادى. وسى كەزەڭدە كورەرمەن نازارىنا 3700 ءتۇرلى جانرداعى قويىلىم ۇسىنىلادى.

«فريندج» فەستيۆالى 1947 -جىلدان باستاپ جىل سايىن ۇيىمداستىرىلادى جانە الەم بويىنشا تەاتر ونەرىندەگى ەڭ ءىرى شارا بولىپ تابىلادى. ايتا كەتەيىك، بيىل ايتۋلى فەستيۆالگە الەمنىڭ 50 ەلىنەن كەلگەن  50000-عا جۋىق ارتيست قاتىسۋدا.

ءبىز بۇدان بۇرىن قىزىلوردا وبلىستىق قازاق مۋزىكالىق دراما تەاترى شوتلانديانىڭ ەدينبۋرگ قالاسىنداعى ءوتىپ جاتقان ونەر «فريندج» فەستيۆالىنە قاتىساتىنى جونىندە حابارلاعان ەدىك.

اۆتور: ءادىلجان ۇمبەت