موڭعوليادا «التاي حالىقتارى» سيمپوزيۋمى ءوتىپ جاتىر
10- تامىزعا دەيىن جالعاساتىن جيىن التايدان تاراعان حالىقتاردىڭ تاريحى مەن مادەنيەتى، ءتىلى مەن سالت-ساناسىنا قاتىستى ماسەلەلەردى عىلىمي تۇرعىدا تالقىلاۋدى كوزدەيدى، دەپ حابارلايدى تۇركى اكادەمياسىنىڭ باسپا ءسوز قىزمەتى.
«التاي حالىقتارى» سيمپوزيۋمى التايستيكا سالاسىنىڭ دامۋ باعىتتارىن پىسىقتاۋعا، عىلىمنىڭ وسىناۋ سالاسىن زەرتتەۋمەن اينالىسىپ جۇرگەن ءتۇرلى قۇرىلىمدار مەن عالىمداردىڭ باسىن قوسۋدى دا كوزدەيدى. سونىمەن بىرگە، الداعى ۋاقىتتا اتقارىلۋى ءتيىس جۇمىستاردى پىسىقتاۋ ماقساتىن دا قويىپتى.
جيىننىڭ اشىلۋ سالتاناتىندا ءسوز العان موڭعوليا ۇلتتىق عىلىم اكادەمياسىنىڭ پرەزيدەنتى دۇگەريين رەگدەل مىرزا التايستيكا باعىتىندا قازاقستاننىڭ اتقارىپ جاتقان جۇمىستارىنا جوعارى باعا بەردى. سونىڭ ىشىندە، استانادا ورنالاسقان حالىقارالىق تۇركى اكادەمياسىنىڭ بۇل باعىتتاعى قىزمەتىن ايىرىقشا اتاپ ءوتتى.
ال، حالىقارالىق تۇركى اكادەمياسىنىڭ پرەزيدەنتى دارحان قىدىرالى سيمپوزيۋم بارىسىندا اكادەميانىڭ التايستيكا جانە موڭعوليستيكا باعىتتارىندا اتقارىپ جاتقان جۇمىستارىنا توقتالدى.
حالىقارالىق ۇيىم موڭعوليا عالىمدارىمەن بىرلەسە زەرتتەۋ جۇرگىزۋدى ءتورت جىل بۇرىن باستاعان. ولاردىڭ العاشقىلارى اياقتالىپ تا كەلەدى. قازىرگى تاڭدا ТWESCO مەن موڭعوليانىڭ ۇلتتىق عىلىم اكادەمياسى بىرلەسە جۇرگىزىپ جاتقان بىرنەشە ارحەولوگيالىق قازبا جۇمىستارى بار.
اتاپ ايتقاندا، بيىل موڭعولياداعى شيۆەت ۋلاان كەشەنىندەگى قازبا جۇمىستارى اياقتالادى. سيپوزيۋم بارىسىندا اكادەميا باسشىسى قازبا جۇمىستارىنىڭ بارىسى تۋرالى ايتىپ، قول جەتكەن ناتيجەلەر جايلى باياندادى.