ا ق ش- تا العاش رەت تۋريستىك پاكەتكە قازاقستان باعىتى قوسىلدى
بۇل تۋرالى قازاقپارات حابار 24 كە سىلتەمە جاساپ حابارلايدى. مۇحيت اسىپ كەلەتىن امەريكالىقتار ءۇشىن ۇلى دالا ەلىندە قىزىقتايتىن دۇنيەلەر كوپ.
دالىرەك ايتقاندا، شەتەلدىكتەر كيىز ۇيدە تۇرىپ، قازاقتىڭ تويلارىنا قاتىسادى. ساياتشىلىق قۇرىپ، اڭ اۋلايدى. ەت اسۋدى ۇيرەنەدى. ساياحاتشىلار ءۇشىن بۇل ساپار ءتىپتى شىتىرمان وقيعا ىسپەتتى.
استاناعا الىستان ات تەرلەتىپ كەلگەن تۋريستەردىڭ دەنى كوركى كوز جاۋىن الاتىن جەرلەردى ارالاۋعا ەتى ۇيرەنىپ قالعان. ال اقش- تاعى ورەگون شتاتىنىڭ تۇرعىنى دجەفف ستەلل مەن ونىڭ قىزى اننانى حالقىمىزدىڭ كۇندەلىكتى كۇيبەڭ تىرشىلىگىمەن ءھام ۇلتتىق سالت-ءداستۇرى قىزىقتىرادى.
ولار بۇل جولى قازاقستانعا ارنايى ات باسىن تىرەدى. امەريكالىق قوناقتار ءبىر اپتانىڭ ىشىندە قازاقتىڭ تويىندا بيلەپ، كيىز ۇيدە تۇنەپ، اڭعا شىعىپ، ەت جەپ قايتتى. «مەن بەشبارماقتى جاقسى كورەمىن. بۇل تاعامنان مەركەدە جانە الماتىدا ءدام تاتىپ كوردىم. ومىرىمدە وسىنشالىق ءدامدى تاماق جەپ كورمەگەنمىن. ءتىپتى، قىزىم ەكەۋمىز ءبىر تاباق ەتتى تاۋىسىپ قويىپپىز»، - دەيدى ا ق ش- تان كەلگەن تۋريست دجەفف ستەلل.
دجەفف پەن اننانى كوك تىرەگەن عيماراتتار مەن وزىندىك ءستيلى بار ساۋلەتتىك كومپوزيتسيالارمەن قايران قالدىرۋ قيىن. سوندىقتان بۇل ەكەۋى ەلوردانى باسقا قىرىنان تاماشالاۋ ءۇشىن الدىمەن استانالىق بازارىنا باردى. وزدەرىنە تاڭسىق دۇنيەلەرمەن تانىستى. ءومىرى جەپ كورمەگەن قاۋىن-قاربىزىمىزدان دا ءدام تاتتى. مۇنداعى ساۋداگەرلەر دە دجەففكە حالقىمىزدىڭ قوناقجايلىلىعىن مەيلىنشە كورسەتۋگە تىرىستى. ءبىرى قاۋىن، ءبىرى بالمۇزداق، ەندى ءبىرى تاتتىلەردەن ءدام تاتقىزىپ جاتتى.
«بۇل جەردە بۇرىن-سوڭدى كەزدەستىرمەگەن، امەريكادا جوق كوكونىستەر مەن جەمىستەردى كوردىك. مۇنداي بازارلاردى ءبىزدىڭ ەلدە كەزدەستىرمەيسىڭ. اسىرەسە، ساۋدا ورنىندا ساتۋشىلاردىڭ جومارتتىعى، قوناقجايلىعى قاتتى ۇنادى»، - دەيدى دجەفف ستەلل.
كەيىن دجەفف پەن اننا كوشەدەگى ساۋدا ورىندارىنا دا باس سۇقتى. امەريكالىق قوناقتار كەڭەس وداعىنان مۇرا بوپ قالعان ۇيلەردىڭ اۋلالارىندا سەرۋەندەپ، جەرگىلىكتى تۇرعىندارمەن دە تىلدەستى. ەركە ەسىلدىڭ جاعاسىندا دا تۇرعىندارمەن ەمەن-جارقىن اڭگىمە-دۇكەن قۇردى. العاش رەت امەريكا قۇراما شتاتتارىندا تۋريستىك پاكەتكە قازاقستان باعىتى قوسىلدى. مۇحيت اسىپ، ءبىزدىڭ ەلگە دەمالۋعا كەلەتىندەر حالىقتىڭ تۇرمىس- تىرشىلىگىمەن جانە ۇلتتىق سالت- داستۇرمەن ەتەنە تانىسادى.
«وسى كۇنگە دەيىن ءبىز 12 تۋريستى قابىلدادىق. 2-3 اپتا ىشىندە امەريكا، يسپانيا، جاپونيادان تاعى 12 ادام كەلەدى. ولار قازاقتىڭ تويىنا بارىپ، كيىز ۇيلەردە تۇرادى. اڭعا شىعىپ، اتقا دا مىنەدى. قىسقاسى، قازاق مادەنيەتىمەن جان- جاقتى تانىستى»، - دەدى كاسىپكەر داۆيد ۆالەرا.
جۇمساق قۇمعا كومىلگەن جاعاجاي، كوك تەڭىز بەن الىپ قوناقۇيلەردەن گورى دجەفف پەن اننا سەكىلدى تۋريستەرگە ۇلتتىق كولوريت قىزىقتى. تاعى 10 شەتەلدىك ازامات سوڭعى اپتانىڭ ىشىندە ءدال وسىلاي دەمالىپ قايتقان ەكەن.