ءارتىس شىلدەنىڭ 25, 27 جانە 29 كۇندەرى دجاكومو پۋچچينيدىڭ «بوگەما» وپەراسىنىڭ پرەمەراسىندا ميمي باس پارتياسىن ورىندادى. وسى ماۋسىمنىڭ سوڭعى تۇساۋكەسەرى وراسان زور تابىسقا كەنەلدى. تىڭدارماندار، قىراعى سىنشىلار مەن ب ا ق وكىلدەرى كلاسسيكالىق ۇلگىدەگى قويىلىمعا تاڭعالىستارىن ءبىلدىرىپ جاتتى.
«موسكوۆسكي كومسومولەتس» كورنەكتى باسىلىمىنىڭ بەتتەرىندە سىنشى ءارى جۋرناليست ەكاتەرينا كرەتوۆا قازاقستاندىق وپەرا ءانشىسىنىڭ ورىنداۋشىلىق ونەرىن بىلايشا سيپاتتادا: «ميمي پارتياسىنداعى ماريا مۋدرياك - وتكەن وپەرا ماۋسىمىنداعى جەكە-دارا ۇلكەن قۇبىلىس. عاجاپ داۋىس. جىگەرلى، وتە ادەمى، تەرەڭ تىنىستى داۋىس ءارى تاپ-تازا داۋىس ىرعاعىن اقىلمەن باقىلاۋعا باعىندىرعان. سونىمەن بىرگە 24 جاسار ءانشى قيالعا بەرگىسىز كوركەم دە سۇلۋ، بۇل ونىڭ كەيىپكەرىنە ەرەكشە سۇيكىمدىلىك پەن كينەماتوگرافيالىق شىنشىلدىق بەرە تۇسەدى»، - دەپ جازىلعان ماقالادا.
جاڭا ساحنالىق نۇسقا اۆتور - ۇلى كومپوزيتور دجاكومو پۋچچينيدىڭ 160 جىلدىعىنا ورايلاستىرىلعان. وپەرانى جاساۋعا حالىقارالىق كوماندا اتسالىستى. سپەكتاكلدىڭ قويۋشى- رەجيسسەرى - جان- رومان ۆەسپەريني (فرانسيا)، قويۋشى- ديريجەرى - ەۆان رودجيستەر (ا ق ش). ستسەنوگراف - برۋنو دە لاۆەنەر، كوستيۋمدەر بويىنشا سۋرەتشى - سەدريك تيرادو، جارىق بويىنشا سۋرەتشى - كريستوف شوپەن، بەينە پروەكتسيالار بويىنشا سۋرەتشى - ەتەن گيول.
ميميدىڭ عاشىعى - رۋدولفتىڭ ءرولىن يتالياندىق تەنور داۆيدە دجۋستي سومدادى. ەستەرىڭىزگە سالا كەتسەك، ماريا مۋدرياك ميمي پارتياسىندا العاش رەت 2016-جىلى «استانا وپەرا» تەاترىنىڭ ساحناسىندا ونەر كورسەتكەن بولاتىن.