الماتىدا جەكەمەنشىك مەكتەپتە بالا وقىتۋ قانشا تۇرادى
الماتىدا مەنشىك تۇرىنە قاراماستان مەكتەپتەردىڭ بارلىعىندا اتا- انالار ورتاق قورعا اقشا وتكىزەدى.
تەك مەملەكەتتىك مەكتەپتەردە قورعا اقشا وتكىزۋ ەرىكتى- ءماجبۇرلى بولسا، جەكەمەنشىك مەكتەپتەردە بۇل مىندەتتى تولەم بولىپ تابىلادى.
مەملەكەتتىك مەكتەپكە بالاسىن وقىتۋ ءۇشىن اتا- انالارعا تۇرعىلىقتى مەكەنجاي بويىنشا قۇجات وتكىزۋ كەرەك.
«اتا- انالار مەكتەپكە بالانىڭ تۋۋ تۋرالى كۋالىگى مەن دەنساۋلىعى تۋرالى انىقتاما، 3x4 ولشەمدى فوتوسۋرەت، تۇرعىلىقتى مەكەنجايى تۋرالى قۇجات اكەپ، ارىز جازىپ كەتۋى ءتيىس»، - دەدى قالالىق ءبىلىم بەرۋ باسقارماسىنان.
ەگەر اتا- انا جەكە ماسەلەلەرگە بايلانىستى 31-تامىزعا دەيىن قۇجات تاپسىرىپ ۇلگەرمەسە، ەلەكتروندى ۇكىمەت ارقىلى ماسەلەنى شەشۋگە بولادى.
جەكەمەنشىك مەكتەپكە قاجەتتى قۇجاتتاردان بولەك، ءوزارا كەلىسىمگە قول قويىلۋى ءتيىس. بۇگىندە الماتىدا جەكەمەنشىك مەكتەپتەردە بالا وقىتۋ ءۇشىن جىلىنا 150 مىڭ تەڭگەدەن باستاپ 7 ميلليون تەڭگەگە دەيىن تولەۋگە تۋرا كەلەدى.
قازاقستاندا ەليتالىق مەكتەپتەر اراسىندا Haileybury Almaty ، «ميراس» جانە «دوستار» حالىقارالىق مەكتەپتەرى كوش باستاپ تۇر. بۇل ءبىلىم وشاقتارىندا وقۋشىنى ءبىر جىلدىق وقىتۋ قۇنى 8 ميلليون تەڭگەگە دەيىن جەتەدى. بۇل تەك وقىتۋ پروتسەسىنە عانا تولەنەتىن سوما، ودان بولەك تەستىلەۋ مەن العاشقى سالىم تاعى بار. Haileybury Almaty مەكتەبىنىڭ وقىتۋشىلارى ايتقانداي، بالانى وقىتۋ قۇنى بالانىڭ جاسىنا قاراي ءوسىپ وتىرادى.
«1,2-سىنىپ وقۋشىلارى ءۇشىن ءبىزدىڭ مەكتەپتە وقۋ قۇنى - 6 ميلليون 646 مىڭ تەڭگە. 3-4 - سىنىپ وقۋشىلارى ءۇشىن وقۋ 1 ميلليون تەڭگەگە قىمباتتاي تۇسەدى. 7-سىنىپتان باستاپ وقۋ ودان ءارى قىمباتتايدى. سەبەبى، بۇل سىنىپتاردا قوسىمشا تەستىلەۋ جۇمىستارى، ەمتيحاندار قوسىلادى. ستاندارتتى قۇجاتتان بولەك، اتا- انالار بۇل مەكتەپتەرگە 428 مىڭ تەڭگە كەپىلدىك تولەم تولەۋگە مىندەتتەلەدى. اتا- انالار مەكتەپتەن شىققان جاعدايدا كەپىلدىك سومانى قايتارا الادى. جاڭادان كەلگەن وقۋشىعا 37 مىڭ تەڭگە تولەۋگە تۋرال كەلەدى. ءبىلىم بەرۋ جۇيەسى ورتا ءبىلىم بەرۋ باسقارماسىنان ەرەكشەلەنەدى. سەبەبى بىزدە بريتاندىق ءبىلىم بەرۋ جۇيەسى بار. بۇل اقشاعا تاماقتانۋ مەن وقۋ كىرەدى»، - دەدى Haileybury Almaty مەكتەبىنىڭ ەسەپ بولىمىنەن.
سونىمەن قاتار، اتالعان مەكتەپ وقۋشىلارى ۇ ب ت تاپسىرمايدى. ولار مەكتەپ بىتىرگەن سوڭ جوعارى ءبىلىم الۋعا شەتەلگە كەتەدى.
وقۋ اقىسىنىڭ قۇنى بويىنشا ەكىنشى ورىندا «ميراس» حالىقارالىق مەكتەبى تۇر. مەكتەپتىڭ رەسمي سايتىندا كورسەتىلگەندەي، وقۋ قۇنى 1,5 ميلليون تەڭگەدەن 5 ميلليون تەڭگەگە دەيىن. كانسەلياريالىق قۇرالداردى، اياق كيىم، سپورت فورماسىن قوسپاعاندا، مەكتەپ فورماسىنىڭ ءوزى 43 مىڭ تەڭگەگە اينالادى. ەگەر اتالعان مەكتەپتە ءبىر وتباسىنىڭ 2 بالاسى وقىپ جاتقان بولسا، ەكىنشىسىنە - 5 پايىز، ءۇشىنشى بالاعا 10 پايىز جەڭىلدىك بولادى.
ال «دوستار» حالىقارالىق مەكتەپ- ليتسەيىندە بارلىق سىنىپ وقۋشىلارىن وقىتۋ قۇنى بىردەي.
«ءبىزدىڭ مەكتەپتە ءبىر ايلىق وقۋ قۇنى - 185 مىڭ تەڭگە شاماسىندا. 9 ايعا 1665000 تەڭگەگە اينالادى. ودان بولەك، الدىن الا تولەنەتىن كەپىلدىك سوما - 400000 تەڭگە بار. وقۋشىنى ۇيىنە جەتكىزۋ ءۇشىن 35000 تەڭگە تاعى تولەنەدى»، - دەدى مەكتەپتەن.
«دوستار» مەكتەبىندە وقيتىن بالاسىنا اتا- انالار وتاندىق «گلاسمان» فيرماسىنان فورما الادى. كيىمنىڭ قۇنى 17000 تەڭگەدەن باستالادى.
بەلگىلى پسيحولوگ وكسانا تارنوپولسكايانىڭ ايتۋىنشا، اتا- انالار قارجىلىق جاعدايعا بايلانىستى تاڭداۋ جاساۋى كەرەك.
«بارلىعى اتا- انانىڭ مۇمكىندىگى مەن پرينتسيپتەرىنە بايلانىستى. ولار بولاشاقتا بالالارىن كىم رەتىندە كورگىسى كەلەدى. اقىلى مەكتەپتەردىڭ تەك اقشاسى عانا ماڭىزدى ەمەس، ءبىراق مۇندا بالامىزدىڭ قوعامعا قارىم- قاتىناسى قالىپتاسادى. ەگەر بالاڭىز ەليتالىق مەكتەپتە 10 جىل وقىسا، بۇل تەك وقۋ عانا ەمەس، بالالار مەرەكەسى، دەمالىستار، الماسىپ وقىتۋ، كوڭىل كوتەرۋ شارالارى كىرەدى. مۇنىڭ ءبارى اقشاعا كەپ تىرەلەدى. جەكەمەنشىك مەكتەپتە وقىتۋ - ادامنىڭ ءومىر ءسۇرۋ وبرازى»، - دەدى پسيحولوگ وكسانا تارنوپولسكايا.
پسيحولوگتىڭ ايتۋىنشا، قارجىسى جەتپەسە دە، بالاسىن وقىتۋعا بار جيعانىن بەرەتىن اتا- انالارعا ۇلكەن جاۋاپكەرشىلىك جۇكتەلەدى.
«سەبەبى، داۋلەتتى وتباسىنان شىققان بالالاردان ءسىزدىڭ بالاڭىز قاتاردان قالماۋى ماڭىزدى. ولاي بولمايتىن بولسا، بالاڭىزدى «ومىردە ەڭ ماڭىزدىسى اقشا ەمەس» دەگەن قاعيدامەن تاربيەلەۋىڭىز كەرەك»، - دەدى و. تارنوپولسكايا.
ايتا كەتۋ كەرەك، بۇگىندە قازاقستاننىڭ بارلىق مەملەكەتتىك مەكتەپتەرىندە جان باسىنا شاققانداعى ءبىلىم بەرۋ جۇيەسى ەنگىزىلىپ كەلەدى. كەلەسى جىلدان باستاپ قازاقستاننىڭ بارلىق مەكتەپتەرى وسى جۇيەگە كوشەدى. مەملەكەتتىڭ مەكتەپتەرگە بولەتىن قارجىسى وقۋشى سانىنا قاراي بەرىلەدى. بيىلعى مالىمەت بويىنشا، ءبىر بالانى وقىتۋعا مەملەكەت جىلىنا 206- 300000 تەڭگە بولەدى.
اۆتور: گۇلميرا عوسمانالي