تۇركىستان وبلىسى ورتالىعىنا اۋىساتىن قىزمەتكەرلەر باسپانامەن قامتىلادى
جانسەيىت تۇيمەبايەۆتىڭ سوزىنشە، وبلىس ورتالىعىنا كوشىپ باراتىن قىزمەتكەرلەرگە تۇركىستان، كەنتاۋ قالالارىنان ۋاقىتشا بەرىلەتىن پاتەرلەر مەن قوناق ۇيلەردىڭ، جاتاقحانالاردىڭ تىزبەسى جاسالدى. ولاردى جالداۋعا رەسپۋبليكالىق بيۋجەتتەن ءار قىزمەتكەرگە اي سايىن 81600 تەڭگەدەن جاردەماقى بەرىلەدى.
«كەلىسىمشارت نەگىزىندە جۇمىس ىستەيتىن بارلىق قىزمەتكەرلەر دە جاتاقحانالارمەن قامتىلاتىن بولادى. جانە دە، ەلباسىنىڭ حالىققا ۇندەۋىنىڭ ءبىرىنشى باعىتى «7-20-25» باعدارلاماسى اياسىندا وسى جىلى تۇركىستان قالاسىندا جەكە سالۋشىلار ەسەبىنەن 6 كوپ قاباتتى تۇرعىن ءۇي، ياعني، 15,6 مىڭ شارشى مەتر بولاتىن 288 پاتەردىڭ قۇرىلىسى باستالعان. 2019-جىلى قۇرىلىسى ءبىتىپ، پايدالانۋعا بەرۋدى جوسپارلاپ وتىرمىز، سوندىقتان دا جاس مەملەكەتتىك قىزمەتكەرلەردى وسى باعدارلاماعا قاتىسۋعا شاقىرامىن»، - دەدى جانسەيىت تۇيمەبايەۆ.
الداعى 1,5 جىل ىشىندە بارلىق قىزمەتكەرلەر قىزمەتتىك پاتەرلەرمەن قامتاماسىز ەتىلەتىندىگىن ايتقان ءوڭىر باسشىسى ەڭبەك ءوتىلى 10 جىلدان جوعارى، مەنشىگىندە پاتەر تىركەلمەگەن ازاماتتاردىڭ باسپانالى بولۋعا مۇمكىندىگى بار ەكەنىن اتاپ ءوتتى.
ياعني، ءتيىستى ەرەجەگە سايكەس قىزمەتكەرلەرگە قالدىق سوماسىمەن قىزمەتتىك پاتەرلەردى جەكە مەنشىككە بەرۋ ماسەلەسى ارنايى كوميسسيادا قارالاتىن بولادى. سونداي-اق جيىن بارىسىندا ءمالىم بولعانداي 2019-جىلى مەملەكەتتىك اكىمشىلىك قىزمەتشىلەرگە ەڭبەكاقى تولەۋ جۇيەسىنە پيلوتتىق رەجيم ەنگىزىلمەك. بۇل جۇمىس ساپاسى مەن ناتيجەسىنە قاراي قىزمەتكەرلەردىڭ ايلىق جالاقىسى 1,5 مەن 2,5 ەسەگە دەيىن كوتەرىلەدى دەگەن ءسوز.