دەنساۋلىق ساقتاۋ مينيسترلىگى دەنيس تەننىڭ دياگنوزىن جاريالادى

استانا. قازاقپارات - الماتىدا ۇرىلاردىڭ قولىنان قازا تاپقان دەنيس تەن بىرنەشە جەرىنەن جاراقات العان، دەپ حابارلايدى قازاقپارات.

«دياگنوز كوپتەگەن تىلىنگەن جاراقاتتارمەن بايلانىستى بولدى. اتاپ ايتقاندا، وڭ جاق سان مەن بوكسەگە كوپتەگەن تىلىنگەن جارا تۇسكەن. سونىمەن قاتار بەتى مەن قوس تىزەسىنىڭ بۋىندارى جارالانعان. قانسىراۋ شوگى سالدارىنان كلينيكالىق ءولىم بولدى»، - دەدى تىلشىلەرگە بەرگەن سۇحباتىندا دەنساۋلىق ساقتاۋ ۆيتسە-ءمينيسترى ءلاززات اقتايەۆا.

ونىڭ سوزىنە قاراعاندا، جەدەل جاردەم بريگاداسىنىڭ بەرگەن تۇسىنىكتەمەسىندە سپورتشى كوپ قان جوعالتقان. اققان قان 1x1,5 مەتر جەرگە جايىلىپ، شامامەن 3 ليتردى قۇراعان. مەديتسينالىق مالىمەتتەرگە سايكەس، سانداعى كۇرەتامىر تۇسىندا ماگيسترالدىق قان تامىرى زاقىمدانعان كەزدە، قان جوعالتۋدىڭ قاتەرلى جاعدايى 2-3 مينۋتتا ورىن الادى.

«بۇل ۇلكەن ماگيسترالدى قان تامىرى. سوندىقتان قان جوعالتۋدىڭ كولەمى قاۋىپتى دەڭگەيدە بولدى. دارىگەرلەردىڭ مالىمەتىنشە، دەنيسكە كەلتىرىلگەن جاراقاتتار وتە اۋىر. ءبىرىنشى كەزەكتە، جاراقات العان ۋاقىتتا قان توقتاتۋعا ارنالعان جگۋت نەعۇرلىم ەرتەرەك سالىنسا، سوعۇرلىم جاقسى بولار ەدى. سايكەسىنشە، قان جوعالتۋ كولەمى دە ازداۋ بولادى. وسىعان وراي ونىڭ ءومىرىن قۇتقارىپ قالۋ مۇمكىندىگى دە ارتار ەدى»، - دەدى ۆيتسە-مينيستر.